Sîyasetkarê kurdî Altan Tanî konferanso mîyanneteweyî ya Mîdyatî de qisey kerd va ke “Serra 1915 a na seserre de jenosîdê armenîyan bîyo. Ez jê (sey) sîyasetkarê na çekuye cêna fekê xo, no qeyd bo.”

Altan Tanî ra gore no qirkerdiş de tena tirkan ney, kurdan kî rolê kay kerd. Heto bîn ra Tanî da zanayene ke destê tayê komîteyanê çekdaran ê armenîyan kî o taw qirkerdişan de estbî. Tanî nîya dewam kerd: “Wextê terteleyê suryanîyan de Şêx Fethullah Hamîdî Mêrdin de ju (yew) fetwa dano vano ke ‘Kiştişê suryanîyan heram o.’ Bi na fetwa ra canê 10.000 suryanîyan xelisnayo ra. Labelê nika sîyasetkarê ke xo ra vanê musluman, dewlete ra şonê dûrî.”

Derheqê îdîaya ke serra 1915 de jenosîd nêame kerdene, Altan Tanî va ke “No welat de o dem nufûs 13 mîlyonî bîbî û nînan ra 1.200.000 armenî bîbîy. Yanî nufûs ra 10% armenî bî. Nika Tirkîya de 40.000 armenî estê. Ez şima ra pers kena, nê armenî kotî yê? Nika vanê, bîyê nêweş, remay, raye ra merdî, xo bi xo şî hardê (erdê) xo terk kerd. 1915 tayê armenîyî amey qir kerdene, vanê tena 100.000 armenîyî amey kiştene. Nika na hûmare kî şenik a? Na hûmare şima kena pak?”