Duîsburg, Wesel, Bottrop, Bonn û Koln ra tepîya şaristanê Almanya Munster de kî dersa kurdkî ya resmî ameye qebul kerdene. Statîstîko aktuel ra gore no taw Almanya de 1.500 domanê kurdî dersanê kurdkî de zonê (ziwanê) xo yê dayîke musenê.
Badê ke murecetê komela kurdan ê dersa kurdkî hetê Wezîrîya Perwerdeyî ya Munsterî ra ame qebul kerdene, bire dîyaye ke 11. oktobre 2011 ra tepîya wendekarê kurdî besebikerê zonê (ziwanê) xo yê dayîke mektebanê almanan de bimusê. Rojanê dişeme û panşemîye saetanê 14:30-16:00 de domanî derse vînenê. Eyaletê Renê Vakurî-Vestfalya ra teber kî Bavyera û Hamburg de dersa kurdkî tayê mekteban de yena dayene. Jê (sey) nimûne, Hamburg de no dem çar wendegehan de panc (ponc) malimî 97 domananê kurdan rê derse danê. Nê şaristan û eyaletan ra teber kî şaristananê bînan ê Almanya û hetta welatanê bînan de dersa zonê (ziwanê) kurdkî qebul bîya. Zafane nê gamî hetê komelanê kurdan ra yenê raver berdene.
Bi Almanya ra nika kurdî besekenê Norweç, Swîs, Armenîstan û Kurdîstanê Başûrî de bi hawayêde resmî dersa zonê (ziwanê) dayîke bivînê. Welatanê jê (sey) Tirkîya, Îran, Sûrîye û tayê welatanê Ewropa jê (sey) Fransa, Îngilîstan ûêb. de ke tede kurdî ciwîyênê, hîna perwerdeyo resmî bi kurdkî çin o. Bitaybetî Tirkîya de panc (ponc) mîlyon ra zêde wendekarî mecbur ê ke 90 serran ra perwerdeyê xo bi tirkî biramê. Heta nika sîyasetê hukmatê Tirkîya perwerdeyo resmî bi kurdkî qebul nêkerdo.
No rindo hama nae ra tepia gereke zone made (Kirmancki) ki perwerde bibo.