Kay kay nêbî ke, felaket bî. Şewa Belo Horîzonte 08. temmuze 2014 axir bî roja tarîxî ya Kupayanê Dinya. Bêşik, fînal hîna nîyo, la kamî key dîyo ke nêmfînalê yew kupayê dinya de pêşkêşkarê kupa bi skorê 7:1 erzîya teber? Hem pêşkêşkaro ke ma vanîme bi xo 5 reyî kupayê dinya qezenc kerdîbî. Yanî.
Xora, 24 deqayan ra dime, merdimî ke qayîtê kaykerdoxanê cagiran ê ekîbê Almanya kerd, dî ke çimanê înan de gumanêde balkêş estbî: ekîbê înan 3:0 raver de bî. Muller dq. 11. de, Mîroslav Klose dq. 23. de û yew deqa ra tepîya Tonî Kroosî dq. 24. de golê Almanya eşt. Eslê xo de a game de netîceyê maçî eşkera bî: Brezîlya do bin bikewo.
Ha de vindê, hona nêqedîya. Almanê ke keyf û kayê înan ca de bîy, dewam kerd: dq. 26. de reyna Kroosî 4:0 çarna. Hîrê deqayan ra dime Samî Khedîra (Xedîra) bi 5:0 ame. Nêm saete vêrde ra, sanika almanan bîye cande. Şeş deqayan de çar golî erzîyay. Kam ke a saete ra dime hêvîya xo ra stad de mend ke leteyo dîyin qayît bikero, tena dina golê André Schurrleyî (dq. 69. û 79.) dîy. Peynîye de Oscarê brezîlyayijî deqaya peyêne de besekerd ke yew gol bierzo. Hende kî beno yanî.
Se bî? Brezîlya, ekîbo favorî, ekîbo ke welatê xo de kay keno, ekîbo ke welatê futbolî ra yeno, bi şerm û şîn, bi ax û wax kupa ra ameye eştene. Almanya ke çend serrî yo hertim resena nêmfînal yan kî fînal, sey pûkele Brezîlya ser ra şîye. Ser o kî Mullerî na kupa de golê xo yo 5. eşt, pêro pîya futbolbazo 24 serran kupayanê dinya de 11 golî eştî. Heto bîn ra, Kloseyî ke bi nê kayî 16 golî ardî ca, nika bî goleştoxo tewr rind ê kupayanê dinya – verê cû no name yê Ronaldoyî bî. Boyna, Kroos ke nêzdî de ekîbê xo Bayern Munîh ra neql beno bi Real Madrîd, vizêr bi di golan erja xo musnaye dinya. Labelê bitaybetî Khedîra bextîyar vejîya: hewt aşman ra ver ke seqetîya xo estbîye, nika peynîya peyêne de xelata xebata xo dîye.
Îzehkerdişê maçê 8. temmuze rehet nîyo. Tabî, estareyê ekîbê Brezîlya Neymar ke seqet bî û kaptan Thîago Sîlva ke çin bî, no dezavantaj bî. Labelê nê sey sebeb bes nîyê. Henî aseno ke stratejîya Brezîlya tenê safî bî. Beno ke o bî ke almanan zerrîserd pêro kêmasîyê brezîlyayijan kerdî eşkera û rind xebitnay. Çi ke bî wa bibo, seba Brezîlya yew travmayo girs o. Êdî tena şansê cayê hîrêyinî mend.
Eke Almanya fînalê Rîo de Janeîroyî yê roja bazarî de duştê Arjantîn ya kî Hollanda de kay kena, emşo bellî beno.
Pepo Pepo!
Şima rê vac ino kay de tewr baş Neuer bi! Fînal: Almanya – Arjantîn 1:2
Ezik hen bawer ken ke Almanya final de keno vind. Brezilya je tere boxeye heriskar kut mac, be plan, be teknik, be organizasyon peyniyede mac kerd vind. Endi mordem besekeneo ke spor dek bivino waxte qehremaniye be strateji viyerdo. Her ci bi plan u proje gureyeno.