Paytextê Norweçî Oslo de roja înîye peyê perojî taxa hukmatî de ju (yew) bomba peqaye, hewt kesî merdî, bi desan kesî kî dirbetin ê. Di-hîrê saetan ra tepîya merdimê (mordemê) kampê cêncan ê vakurê paytextî de bi çekan nano cêncan ra û tewr tay 80 însanan kişeno. Henî aseno ke her di serebûtê suîkastî girêdayeyê ju (yew) planî yê. Polîsê Norweçî ra gore no suîkastê terorîzmê mîyanneteweyî jê (sey) al-Qaîda nêbî. Planviraştox û kiştoxê cêncan ê kampî kî ame pêgirewtene.
Taxa hukmatî ya paytextê Norweçî Oslo de vizêr ju (yew) bomba peqaye. Peqayîş de hewt kesan dinyaya xo vurna, xeylê kesî dirbetin ê. Dayîre û banê (bonê) dormeyî kî zerarêde girs girewt.
Dima, ju (yew) kampê cêncan ê partîya sosyal-demokrate girawa Utoya de merdimê (mordemê) ke unîformaya polîsî girewt pira, bi tufangê xo 84 cêncî kiştî. Nameyê merdimo (mordemo) norweçijo 32serre Anders Behrîng Breîvîk o. Melumatan ra gore têkilîya xo bi derûdorê radîkal-rastgiran esta. Suîkast ra dime hêzanê antî-terorî Breîvîk pêgirewt. Henî yeno vatene ke nêzdî de do îfadeyê xo bikero. No esna de kî juna (yewna) keso gumankerde ame pêgirewtene.
Polîsê Osloyî ra gore nê serebûtî duştê pêro texmînan de suîkastê terorîzmê mîyanneteweyî nêbî. Bi îhtîmalêde girs na çalakîya cayî bîya ke duştê sîstemêde nikayên ê Norweçî de gureya. Nika polîs û eskerî şaristanê Osloyî de kontrolan virazenê.
Aktuelkerdiş: Polîsê Norweçî ra gore suîkastan de pêro pîya 76 kesî merdî.
