Raverşîyayîşê ekonomîya Tirkîya xirt o, ameyeyê şarî yo serrane 2001 ra gore bîyo hîrê qat. Stabîlîteyê sîyasetî yê serra 2000 ra tepîya ekonomî kî rind raver şîye, labelê hewna Lîra duştê Euro û Dollarî de erja xo keno vîndî.

Pisporanê ekonomî ra gore ju (yew) nakokîya girse werteyê melumatanê hukmatê Tirkîya û ÎMF û kotişê Lîrayî de esta. Ju (yew) welat de ke ekonomîye rind raver şona, gerek erja pereyê nê welatî kî bibo berz. Tirkîya de rewşe henî nîya, hetê ra yeno vatene ke konjunktur berz o, heto bîn ra kî Lîra her roje erja xo keno vîndî. Ju (yew) serre de Lîrayî duştê Euroyî de 15,29 % yê erja xo kerde vîndî, duştê Dollarî de kî bi 5,73 %.

Statîstîkê ekonomîya Tirkîya ra gore des serran de durumê deyndarî yê dewlete 50% bîya kêmî. Heto bîn ra merdim (mordem) xo vîr ra mekero ke deyngirewtişê Yunanîstanî kî heta krîzê welatî her serre bîyêne kêmî. Analîstî îqaz kenê ke peynîya Tirkîya jê (sey) Yunanîstan nêbo.

Problemêde girs ê welatî pêraameyîşê ekonomî yo. Tena 30 % yê hasîlayê zereyê welatî sermaye benê. Na hûmare zaf qijkek a. Aye ra kî dot analîzan ra gore deynê ke yenê zereyê welatî, nêşonê sektoranê ekonomî, la xerc benê. No hal nîşanêde muhîm o, Yunanîstan de kî nîya bîyo. Uca (uza) kî pereyî nêşîy zereyê ekonomîye, desinde amey xerc kerdene. Coka pisporê ekonomî vanê ekonomîya Tirkîya girêyena, tehlukeyê serdeşîyayîşî tey esto. Kovara “The Economist” ra gore kî Tirkîya dinya de welato 6. o ke tede rîskê zêde germbîyayîşê ekonomî tewr berz o.

Goreyê nê têde analîzan ra Lîra do hîna erja xo duştê Euro û Dollarî de vîndî bikero.

CEWAB BIDE

Keremê xo ra şîroveyê xo binuse
Keremê xo ra nameyê xo binuse