Mîtîngê boykotî Bursa de wekîlê partîya BDP Akin Bîrdal gama ke qeseyê xo kerdêne, hetê ju (yew) mordemê (merdimê) tirkî ra ame hêriş kerdene. Hêrişkar bi (ebe) girmike û sare (sere) hêrişê Akin Bîrdalî kerd.
Hêrişkar enformasyonanê rojnameyanê Tirkîya ra gore unîversîteya Marmara da waneno û nameyê xo Bîlgîhan Şîmşek o. Hêrişê Bîrdalî ra tepîya kurdê ke cayê mîtîngî de bîyê, da hêrişkarî ro û o bi hewayêde ciddî dirbetin kerd. Bîlgîhan Şîmşek hetê polîsê tirkî ra ame xelesnayene û ame berdene bi nêweşxane. Dirbetê Şîmşekî henî giran bî ke raya nêweşxaneyî de besenêkerd ke payan ser o bivindero. Şîmşek şaristanê Orduyî de ameyo dinya û goreyê melumatanê hesabê xo yê Facebookî ra bi îhtîmalêde girs hetê vînayîşê xoyê sîyasî ra dîndar, rastgir û nasyonalîst o.
Rewşa Bîrdalî rind o, teyna (tena) hetê çepî yê rîyê xo de tenê bîyo dirbetin. Bîrdal hêriş ra dime hetê mîtîngdaran ra ame seveknayene. Hêriş ra tepîya mîtîng dewam kerd, Bîrdalî qeseyê xo de vat ke “No provokasyonêde plankerde yo, dewamê Înegolî û Dortyolî yo. No hêrişê yew (ju) kesî nîyo. Hêrişkarê Ahmet Turkî hîrê aşmeyan ra tepîya hepis ra vejîya. Ê wazenê ke hêrişanê nîyanênan dewam bikerê. No kes muhîm nîyo, kamî ke peyê ey der ê, ê muhîm ê, gerek ma înan dîyar bikerîme. No hêriş de ma hêzdarîya boykotî û bêhêzîya hukmatî vînenîme. Na yena ra a mana ke ‘heya’ û ‘ney’ yê boykotî înan zaf tersnenê.”
Parlamenterê Dîyarbekirî yê BDP Akin Bîrdal serra 1998 de kî hetê dewleta xorîne ra rastê hêrişî bî û bi 17 qersunan ra xeylê aşmeyan koma de mendîbî.
