Xeylê pisporan ra gore cengo serdin ra dime êndî îhtîyacê ajanan çin o, labelê rasta ci a ya ke pêro dinya de hîna xeylê ajanî wezîfe der ê. Ê enformasyonan endustrî, leşkerîye û tekonoljî ser o arê kenê û înan roşenê. Ewropa, Amerîka û Çîn girewtekê muhîm ê. Sey (jê) nimûne, rojnameyanê Amerîka ra gore DYA de hîna 400 ajanê urisî estê. Ê bi xo sirf uris nîyê, amerîkayijî ke seba Rûsya ajanênîye kenê, kî teder ê.
Nê rojan de ajanê urisî ke Amerîka de amey pêgirewtene, fekê şarî ser o yê. Ajanê urisî ke Amerîka de ameybîy pêgirewtene, roja 09.07.2010 de pê teqesê mabênê DYA û Rûsya ancîya (onca) Rûsya der ê. Wezîfeyê înan o bî ke Amerîka de enformasyonan arê bikere, yanî fotograf biancê (bioncê) û sîyasetkaran reyde bikuyê îrtîbat. Pêro ajanî xo Amerîka de rind entegre kerdîbî, uca (uza) şîyêne kar, xo rê banan (bonû) herînaybî, bêqusur îngilizkî qisey kerdêne û der û cîranê xo mîyan de xeylê amerîkayijî estbîy. Nê ajanan ra çapemenîya sansasyonele de ajana urise Anna Chapman bîye namdare, aye ra Înternet de fotografê seksuelî neşr bîbîy. Chapman merdimêde îngilîz de zewejîyaybî û tepîya ancîya bîya cîya. Ajanê ewroyênî henî nimitkî komel de nêciwîyêne, eksê ey de ê zewejînê, banan herînenê, domananê xo rusnenê mekteb û sey hemwelatîyêde normal weşîya xo ramenê.
Labelê hîkayeyanê çapemenîya sansasyonele ra teber rastîye henî biheyecane nêbîya. Ê ajanî bi (ebe) ûsulanê kanan gureyayêne, zêde enformasyonî kî arê nêkerdê. Des serrî binê qayîtkerdişê servîsê nimitkî yê DYA de bîyê. Ajanê urisî bêfayde gureyayêne. Seba ke têkilîya DYA û Rûsya ke no taw game bi game bena weşe, xirabin mebo, ajanî çapik Vîyana de amey teqeskerdene.
