Wekîlê partîya CHP yê Dêrsimî Huseyîn Aygunî roportajê xo de bi rojnameyê Muhalif Gazete de partîya BDP û PKK giran rexne kerd. Aygunî venga roşnvîranê tirkan da ke PKK rexne bikerê.
“Rêxistine [PKK] gerek êndî çekanê xo verdo. Hîna 3-5 aşmî çekancaverdayîş ra ma na mesele fehm nêkenîme. Ez kî bawer kena ke no ju (yew) taktîk o, zerre ra nêno waştene. Ju (yew) kî, rêxistine hêrişê sîvîlan kena. No wisar Dêrsim de înan panc (ponc) kesî kiştî. Noca (naza) de rêxistine fîgurê ke ser o sîyaset kenê, tedaya çetine virazenê. Dîyarbekir de, Dêrsim de. Wijdanê roşnvîran gerek naye krîtîk bikerê. Labelê ez roşnvîranê tirkan de naye nêvînena.”
Aygunî roportaj de da zanayene ke weçinitşê Dêrsimî de binê tedaya BDP de vêrd ra. “Dêrsim kerd rêxistine. Ma Dêrsim de tena binê terorê PKK de ney, la binê terorê BDP de kî kampanyaya weçînitişî viraşt. Labelê roşnvîrî naye qey rojeve nêcenê? Gerek ê naye kî rexne bikerê. Dêrsim de PKK û Dîyarbekir de AKP ma tehdîd kerdîme.”
Huseyîn Aygunî venga roşnvîran da ke gerek ê PKK krîtîk bikerê. “Roşnvîrê ma wextêde derg kotî PKK dima. Rexnê nêkenê, tena rexneyê hukmat û dewlete kenê.” Boyna Aygunî îdîa kerd ke şaro kurd nêwazeno ke Tirkîya ra cîya bibo. “Xeletîya BDP a ya ke bi nameyê şarê kurdî qisey kena. Pêro kurdî henî nêfikirînê. Qiseyê nîyanênî xizmetê aştîye nêkenê. Seke cîyabîyayîş bê gonîrişîyayîş, bê pêrodayîş û bê jenosîd nêbîyo ke ha netîceyê trajîkê cîyabîyayîşî esto. Cîyabîyayîş bi raya aştîye heta nika nêbîyo. No semed ra kam ke cîyaybîyayîş destek keno, kî poştîya (piştîya) prosesê trajedîya nîyanêne dano.”
