Meyîtê kurdanê ke hetê jetanê artêşa tirke ra amey kiştene, amey wedardene. 30.000 ra zêde kesan term rast kerd berd goristan. Tabûtî bi renganê neteweyî yê kurdan amey neqişnayene. Raywanîya cenezayan de sloganî jê (sey) “Dewleta qetile hesab dana” û “Qetil Erdogan” amey eştene, pîlan şîwareyî vatî. Uca (uza) de ame dîyene ke meyîtî hetê bombayan ra bîyê parçe-parçe. Meyîtê Aslan Oncuyî ke hîna 15 serrî de bî, lete-tele ame dayene hard (erd).
Cenaza de Ahmet Turk, Gultan Kişanak, wekîlê BDP, temsîlkarê Mesûd Barzanî Azad Goyî û xeylê kurdan cayê xo girewt. Ahmet Turkî qiseykerdişê xo de va ke “Eke no jenosîd nîyo, ma çik o? Ê wazenê ke şarê kurdî bêveng, bê heq û bê huqûq verdê. Her kes bizano ke ma gama xo peyser nêerzenîme. Jenosîd ser o qisey kenê, ma no jenosîd nîyo? Esad û Kaddafî rexne kenê, labelê çîyo ke înan nika kerdo, kerdena Esad û Kaddafî ra tenêna giran o. Înan şarê xo bomba nêkerd. Serekwezîrê Tirkîya tarîx de cayê serekê jenosîdviraştoxî cêno.”
