Komela Heqanê Merdiman (ÎHD) bi munasebetê roja domanan a mîyanneteweyî ke 20. teşrîne de yena pîroz kerdene, vilawekêda xo de da zanayene ke Tirkîya de domanî, bitaybetî domanê kurdî, binê tesîrê tersî de benê pîl. Domanî ke kurd ê, rastê mewzûyê “teror”î benê û erja xo ya domanîye kenê vîndî.
ÎHD ra gore domanê kurdî Tirkîya de heqanê xo ra benê, beyanatê xo de ÎHD da zanayene ke xeylê domanî besenêkenê şêrê mekteb, hêgayan ser o ya kî kuçeyan de gureyenê. Aye ra kî dot ÎHD bale ante (onte) mesela ser ke domanî zafê reyan jê (sey) hêzê karî yo erjan yenê dîyene û coka dinyaya karî de yenê îstîsmar kerdene.
Domanî kurdî kî heqê xo yê perwerdeyê bi zonê (ziwanê) dayîke ra mehrum benê. Domanê kurdî kî zafê reyan nîşanê terorîstî cênê, ÎHD jê (sey) nimûne Ugur musnena ke hardlerzê (erdlerzê) Wanî de dinyaya xo vurna û ke fikrêumûmîya Tirkîya de jê (sey) “terorîst” şîrove bîyo, hetta derheqê ey de zura pêrodayîşê çekdarî bîya vila. Xora, domanbîyayîş Rojhelato Mîyanên de zor o, pêro ceng û pêrodayîşan de zafê reyan domanê mehsumî benê qurbanê partîyanê çekdaran. Ê domanî cêncîya xo ya binê tersî de ya kî binê tesîrê îdeolojîyanê terefdaranê îxtîlafî de vîyarnênê.
ÎDH vilaweka xo de nimûneyê domanêde kurd bi nameyê Welatî dana ke sebebê kemereştişî ra ameybî pêgirewtene. Tey vana: “Welat ke kurd o û nameyê xo yeno leweyê ‘terorî’, o yanî êndî doman nêbeno? Welatî mintiqaya de ke binê teda, pêrodayîş û merdişî de menda, tede reyê polîsan rê kemere eşte û derheqê ey de bi des serran ceza ameye waştene. Ma seba ke Welat kurd o, ganîyîya sîstemêde edaletî seba domanan darîna we? Welat êndî jê (sey) domanî say nêbeno. Ma qerarê nêdîyayîşê pîyê xo seba ju (yew) serre zerar nêdano ey?”
Komele bala wendoxan ancena (oncena) ke gerek her domanî jê (sey) domanî bêro hesibnayene û gerek pîlê welatî hem domanan biseveknê hem kî dinyaya ke domanan heq kerda, weye bikerê. “Nameyê xo çi beno wa bibo, her doman aştîye heq keno.”
