Dewleta Îtalya semedê deynanê xoyê berza berzan ra kî faîzêde berz dana. Hewteyo verên ajansê ratîngî S&P kredîbîlîteyê welatî kerdîbî nizm, coka goreyê wezaretê malîye ra Îtalya mezatê tehwîlanê dewlete de mecbur bîye ke faîzê 5,86% pêşkêşê sermayegozaran bikero. Tarîxê Euroyî de na reya verên a ke malîyetê neweraperegirewtişî seba welatêdê YE hende berz o
Sebebê faîzêde henî berz kî sermayegozar ê ke seba herînayîşê tehwîlanê dewlete zêdîyayîşê rîskî tey hesibnenê. Naye ra Îtalya Yunanîstan ra tepîya faîzo tewr berz ê YE dana. Xora, waştişê tehwîlan zêde nêbî. Pêro pîya mezatê tehwîlanê dewlet ê wextdergan ra Îtalya tena 7,86 bîlyon Euroyî qezenc kerd.
Hewteyo verên ajansê ratîngî S&P kredîbîlîteyê Îtalya kerdîbî nizm bi notê “A”. Jê (sey) semedî S&P da zanayene ke hem deynê Îtalya zaf ê hem kî raverşîyayîşê ekonomî rind nîyo. Aye ra kî dot hukmatê Îtalya karê ekonomî de pêt nêaseno. Seba ke sermayegozarî tehwîlanê Îtalya biherînê, ê faîzêde berz wazenê.
Jê (sey) çare, welatê Îtalya nika wazena malê dewlete biroşo. Hukmat hêvî kena ke nîya 35-40 bîlyon Euroyî qezenc bikero. Sirf rotişê emlak û dayîreyan de 25-30 bîlyon Euroyî estê. Eke planê wezaretê malîye rast vejîna, nîya deynê dewlete her serre bi 9,8 bîlyon Euroyî benê kêmî. Deynê Îtalya nika 1,9 trîlyon Euro yê. Na hûmare 120% yê hêzê ekonomî ya. Yewîya Ewropa (YE) de tena deynê Yunanîstanî zêde r’ ê.
