Îttîfaqo stratejîk ê Îsraîl û Tirkîya nê rojan de hêdî-hêdî rijîno. Raporê MY ra tepîya Komara Tirkîya seba kiştişê new tirkan gulana 2010 de waşt ke welatê Îsraîl ozr biwazo. Seba ke Îsraîlî no waştiş red kerd, her di hetî nika nengê jubînî (yewbînan) çînenê.
Jê (sey) reaksîyon, Tirkîya têkilîya xo ya eskerîye bi Îsraîl kerde kêmî, serekwezîr Recep Tayyîp Erdoganî kî tehdîd kerd ke fîloyê eskerîya Tirkîya û tayêna keştîyanê ardimkerdişî birusno Deryaya Sipîye. Beno ke Erdogan bi xo Xeze zîyaret bikero. Naye ser o wezaretê karanê teberan ê Îsraîlî qet şîrove nêkerd, labelê rojnameyê Jedîot Axronotî yê îsraelijî ra gore Îsraîl do Tirkîya ceza bikero.
A xebera rojnameyî ra gore wezîrê karanê teberî yê Îsraîlî Lîebermannî fikirîno ke lobîyê armenîyan ê DYA de bêro têlewe û poştîya (piştîya) qebulkerdişê jenosîdê armenîyan bido. Heta nika Tirkîya de qirkerdişê armenîyan ê serra 1915 resmî yeno înkar kerdene û hîna meselêda zor a. Aye ra kî dot beno ke Lîebermann plan bikero ke Ewropa de serekîya PKK de bêro pêser ke ardimêde eskerî pêşkêşê hêzanê PKK bikero. Na mesele kî dîplomatanê Tirkîya qehirnena.
Ser o kî mumkin o ke Îsraîl dest bi kampanyêda mîyanneteweyî duştê zulmê kêmneteweyan de bikero, yanî ê kurdanê Tirkîya. Lîebermann nîya neql bî: “Ma do Erdoganî bimusnîme ke rezîlkerdişê Îsraîlî nafîle yo.” Serekê partîya ultrakonzervatîf a “Beîtenu Îsrael” (Banê Ma Îsraîl) va ke “Ma Tirkîya rê pêşnîyaz kenîme ke duştê Îsraîlî de rêzdar bo.” Erdoganî da zanayene ke nika ra keştîyê ardimî binê sitara fîloyê eskerîye de do şêrê bi Xeze. Partîya radîkal-îslam a Hamasî na gama Tirkîya weş dîye.
Têkilîya Tirkîya û Îsraîlî operasyonê keştîya Mavi Marmara yê gulana 2010 ra bi nat giran a. Îsraîlî o wext merdişê new aktîvîstan rê merhamet musnaybî, labelê ozrê Tirkîya nêwaştîbî. Hewteyo verên kî raporê Miletanê Yewbîyayeyan (MY) da zanayene ke blokajê Îsraîlî hawayêde pêroyî de rast o, labelê operasyonê Mavi Marmara bi xo zêde şidetin bî. Naye ser o Tirkîya sersefîrê Îsraîlî teber kerd û kontratê xo yê eskerîya birnay.
