Ajansa ANF edîtorê rojnameyê verênî yê kirmanckî NewePelî ke 15 rojan de reyê vejîna, Roşan Lezgînî de ju (yew) roportaj viraşt. Roşan Lezgînî no roportaj de derheqê vetişê NewePelî û rewşa kirmanckî de melumatî day. Lezgîn: “Eke kirmanckî û lehçeyanê bînan de weşanî çin bê, nê benê vîndî şonê.”
Heta nika new hûmarê rojnameyê kulturî NewePel vejîyayê. Vatena Roşan Lezgînî ra gore zonê (ziwanê) ke no taw bê rojname, bê radyo û bê televîzyon ê, benê vîndî. Ey ra gore gerek her lehçeya kurdkî bi xo wayîrê şexsîyetê bo, xo bi xo raver şêro. “(…) Çîyêde tewr muhîm resmîbîyayîşê kurdkî yo. Gerek resmî bo. Eke bena resmî, hem kirmanckî hem kî kurmanckî şanşê ciwîyayîşî vînenê, gerek ke bivînê. Rojnameyê NewePelî mucadeleya wayîrbîyayîşê şexsîyetêde kirmanckî mîyanê lehçeyanê kurdkî der a.”
Roşan Lezgînî ard zon (ziwan) ke xebata kirmanckî ra qezenc nêvejîno. Seba ke xebata zonî (ziwanî) karêde wijdanî yo, raverşîyayîşê zonî (ziwanî) kî zor o. “Êyê ke bi kurdkî wanenê û nusenê, çapemenîya kurdkî teqîb kenê, ê semedê îhtîyacîya xoya nasnameyî ra bi kurdkî eleqedar benê. Çike rastîye de, mavajîme jê (sey) Kurdîstanê Başûrî de, êndî heyato rojane de durum henî nîyo. Tirkî, yanî asîmîlasyon kot mezgê ma.”
Lezgînî ra gore problemêde weşanayîşê kirmanckî kî kêmîbîyayîşê wendoxan û eleqedarîya înana şenik a. “Şima ke ju (yew) zon (ziwan) zanenê, seba wendişê rojnameyî ra ancîya (onca) gerek şima tenê perwerde bivînê. Naye ra problemê mayo girs o yo ke rojnameyê ma werteyê şarê ma de eleqeyêda girse nêvîneno. Aye ra kî dot vilabîyayîş de ma çetinîye ancenîme (oncenîme). Ma hîna her cayo ke tede kirmanckî qisey beno, nêreştîme. (…) Aboneyê ma zaf tay ê. (…) Eke rojname abone bo, problemo mayo tewr girs beno vîndî. Abonebîyayîş zaf rehet o. Merdim (mordem) şikîno pê Înternet ya kî telefon ma de bikuyo îrtîbat, ma kî rojname biserûber rusnenîme adresa posta. Eke ma besenêkenîme çimeyê bivînê, beno ke ma heta hûmara 12. neşrîyatê xo dewam kenîme, labelê peynîya ci bellî nîya.”
Rojnameyê NewePelî ke safî bi kirmanckî vejîno, hetê Komela Ziwan, Huner û Kulturî (Ziwan-Kom) ra yeno weşanayene. Seba abonebîyayîş keremê xo ra adresa e-maîlî ya newepel@hotmail.com rê binusê.
Adresa Waştişî:
E-maîl: newepel@hotmail.com
Tel: (0 412) 228 14 55, (0 412) 223 03 69
Adrese: Lise Cd. 3. Sk. Elif Apt. Kat: 3, No: 11 Yenişehir / Dîyarbekir
