Tayê şaristananê Tirkîya de kurdî hetê tirkanê radîkal-faşîştan ra amey hêriş kerdene. Qewexane, tomofîl û banê (bonê) tayê kurdî amey veşnayene. Tayê kurdî kî bi xo rastê şiddetî bîy, tayêna kî hetê polîsê tirkî ra amey pêgirewtene.
Bitaybetî qezaya Îstanbulî Zeytînburnu de tirkî û arnavûtijan hêrişê kurdan kerd. Polîsî uca (uza) virênîye ro nê hêrişî kî nêgirewt. Enformasyonanê rojnameyanê kurdan ra gore nê aksîyonê lînçî keyepelê Facebook ser o organîze bîy.
Halîs Abdurrahmanoglu Antalya ra ameybî Zeytînburnu ke birayê xo zîyaret bikero. Uca (uza) de bi birayê xo hetê grûbêda tirkan ra amey lînç kerdene. Abdurrahmanoglu Dîyarbekir ra û pîyê hewt domanan o. No taw o nêweşxane de cerrahîya mezgî de kuno ra.
Birayê Halîs Abdurrahmanogluyî ajansa ANF de qisey kerd û vat, “Ma heta nika werteyê însanan de cîyayîye nêkerd. Nê yenê hêrişê ma û banê (bonê) ma yê karî kenê. Ro nasnameyê ma heqeret kenê. O ra dime kî medyaya Tirkîya cêncê ma sucdar musnenê. Nîyadê halê birayê mi de. Hebikê mendo ke bimiro. Bêar serekê polîsê Îstanbulî Mehmet Alzînok no çete rê verê kamerayan de sipas keno. Ju (yew) hewte yo ke ma duştê merdişî der îme. Polîs duştê ma der o, medya duştê ma der a, hukmat duştê ma der o. Ma se kenîme? Lînçbîyayîş qebul bikerîme?”
