Wekîlo verên ê suryanî ê tarîxê Komara Tirkîya Erol Dorayî Ajansê Xeberan ê Firatî (ANF) de qisey kerd û venga suryanîyan da ke welatê xo terk kerd, wa peyser bêrê.
Dorayî nîya qisey kerd: “Mi ra gore zerekotişê xo bi parlamento henî muhîm nîyo. Ci ra daha muhîm o yo ke şaro suryanî ke heta nika cayê ey nêame dayene, parlamento de temsîl bo. Vatena Tirkîya de her kes têduşt o, labelê no tena teorî de maneno, xelet o. Mi ra gore gerek na têduştîye pratîk de kî bêro ca.”
Dorayî va ke BDP reya verêne ey rê teklîf kerdo ke ey bibo wekîl. Na gamêda zaf muhîme bîye. Dorayî ra gore na game ra mabênê şarê kurdî û suryanî beno tenêna rind. Erol Dora wazeno ke suryanîyê ke xeribîye de ciwîyênê, peyser bêrê hardê (erdê) xo. “Ez wazena ke şarê ma yo ke teber ra yo, racêro cayê xo, weşîya xo tîya (îta) biramo. Ez bawer kena ke rojê yena ke pêro şarî pîya jê (sey) birayan ciwîyênê.”
