Serekê organîzasyonê terorî El-Qaîda Ûsame Bin Laden hetê komandoyê taybetî yê Amerîka ame kiştene. Serekkomarê DYA Barack Obamayî naye verê kamereyan de kerd eşkera. Bin Laden Pakîstan de çêyê (keyeyê) xo de bi (ebe) ju (yew) laj û hîrê hevalanê xo ame kiştene. Operasyonê hêzanê DYA de kî ju (yew) cinîke merda. Enformasyonanê televîzyonê Amerîka ra gore şeş doman û hîrê domanê Bin Ladenî, aye ra kî dot çar îslamîstî nêzdîyê banê (bonê) Bin Ladenî de amey pêgirewtene.
Bin Ladenî heta nika xo banêde (bonêde) bi dêsanê berzan şaristanê Abotabadî Pakîstan de dardo we. Goreyê zanayîşê îstîhbaratê DYA CÎA cayê roniştişî yê Bin Ladenî uca (uza) bî. Serran ra CÎA ro Bin Ladenî cêra (gêra), peynîye de operasyonê 40 deqayan de o kişt. Melumatê artêşa DYA ra gore meyîtê Bin Ladenî ame eştene bi derya, uca (uza) wedarde yo.
Hukmatê DYA da zanayene ke testê DNA ra tepîya ê 99,9% emîn ê ke keso ke ame kiştene, bi rastî Bin Laden bî. Heta fotografê Bin Ladenî esto ke heta nika nêame neşr kerdene.
Tayê pisporî nika tersenê ke kiştişê Bin Ladenî ra dime el-Qaîde do heyfê xo bicêro. Dîrektorê CÎA Leon Panettayî da zanayene ke bi kiştişê Bin Ladenî el-Qaîda nêmirena. Wezîra karanê teberî yê DYA Hîllary Clînton qiseykerdişê xo de televîzyon de venga Talîbanê Efxanîstanî da û va: “Vatena ma Talîban rê nêvurna, labelê ewro tenêna giran o. Şima besenêkenê ma biqefilnê, (…) feqet şima besekenê weçînê: el-Qaîda ra tepîya bikuyê prosesê demokrasî û aştîye.”
Jê (sey) reaksîyonê kiştişê Bin Ladenî xeylê amerîkayijî kuçeyan de bîy û kiştişê ey pîroz kerd. Şaristanê Pakîstanî Quetta de xeylê însanî operasyonê Amerîka protesto kerd, alaya DYA veşna.
Ûsame Bin Laden serra 1957 de Erebîstanê Seûdî de şaristanê Rîad de jê (sey) domanê multî-mîlyoner Mohammed Bin Ladenî ame dinya. 50 ra zêde way û birayê Bin Ladenî estbîy. Sireyo ke Bin Laden doman bî, pîyê xo qezayê teyara de dinyaya xo vurnaye. Panc (ponc) cinî û 23 domanê Ûsame Bin Ladenî estê. Bin Ladenî unîversîteyê Jeddahî, fakulteyê Management (Sermîyanîye) û Ekonomî de wend. Badê ke Yewîya Sovyetan kot Efxanîstan, o şî cengdaranê ereben ra pîya da pêro. O wext hetê DYA ra destek girewtêne, serra 1996 ra tepîya mabênê ey û DYA bîyo xirabin, tepîya Bin Laden bîyo serekê el-Qaîda.
