Rojnameyo sîyasîyo kurd Özgür Gündem (Rojeva Azade) ke 17 serran ra ver hetê dewleta Tirkîya ra ameybî qedexe kerdene, ancîya (onca) vejîno.
17 serrî raver rojnamenusanê kurdan duştê îşkence, kiştiş û remnayîşî de karê xo yê rojnamegerîye ramitîbî, rojnameyê ”Özgür Gündem” vetîbî. Aşma gulan a 1992 de hetê hêzanê “dewleta xorîne” ra rojnamegero juyin (yewin) ê Özgür Gündemî ameybî kiştene. Naye ra tepîya mabênê di serran de 70 ra zêde rojnamegerî amey kiştene. Tena no rojname ra ney, 200 ra zêde domananê ke rojname kerdêne vila, amey kiştene. Dima, banê (bonê) Özgür Gündemî Îstanbul de ame bomba kerdene, naye ra dime kî rojname resmî ame qedexe kerdene. Serekwezîrê Tirkîya ê wextî Silêman Demîrelî a serre rojnamenusan ra vatîbî ke “Nê rojnamegerî nîyê, mîlîtan ê ke kote tonê rojnamegeran.” Tepîya kî îdîa kerdîbî ke qaşo rojnamegerî xo bi xo bikiştêne.
17 serran ra tepîya rojnamegero tirk Mehmet Alî Birandî na mesele ser o nuşto ke “Dewlete nê rojnamegerî kerdî lete-lete. Çîyo ke daha xirabin o, ma jê (sey) medyaya tirke tena bêveng qayîtê nê qirkerdişî kerd. Tayêne çepikî day piro, tayêne va ke gerek no rojname bêro bêveng kerdene.”
Edîtorê Özgür Gündemî Huseyîn Aykolî vetişê rojnameyî ser o hîsê xo nîya ard ra zon (ziwan): “Ma xeylê dej dî, labelê no bêerje nîyo. Eke merdim (mordem) ewro çekuya Kurdîstanî teber ra serbet vano, bêters meseleya kurdan ser o qisey keno, no sayeya nê dejî ra mumkin bîyo.”
