Partîya tirke CHP emser hîrê kesê ke têkilîya xo bi Ergenekon ra bîye û hetta hepis der ê, rusnena weçinitiş. Mustafa Balbay, Mehmet Haberal û Sînan Aygun cayanê rindan de jê (sey) namzed amey musnayene. Ê hîrê ergenekonijî meseleya kurde de înkarîya xo eşkera nêkenê. Jê (sey) nimûne, înan ra Sînan Aygunî îdîa kerdîbî ke meseleya kurde çin a, tena meseleya terorî esta.
No qerarê partîye ra tepîya tayê endaman rexneyê xo bi îstîfaya xo da musnayene. Enver Aysever û solîstê Grûba Yorumî Hîlmî Yarayicî CHP ra îstîfa kerd. Yarayicî va ke “Mi ke lîsteya wekîlan dîya, şaş bîya menda. Na lîste mi zere ra kerd dirbetin. Tayê nameyî jê (sey) Haberal û Aygun tede estê ke ez nêwazena înan de binê ju (yew) çatî de bîne.”
Namzedîya Haberal û Aygunî kî Dêrsim de xeylê ameye rexne kerdene. Heto bîn ra kî sermîyanîya CHP yê Riha seba ke endamê înan nêamey weçinitene, îstîfa kerd.
Partîya CHP hîna perwerdeyê bi zonê (ziwanê) dayîke qebul nêkena. No tarîxê dinya yê sosyaldemokrasîye de nimûneyo jukek (tek) o. Serekê partîye Kemal Kiliçdarogluyî qiseykerdişê xo de newe ra va ke kurdkî musayene problem nîya, labelê perwerdeyê bi zonê (ziwanê) dayîke komel keno parçe.
