Deyîrbazo namdaro dêrsimij Ferhat Tunç jê (sey) parlamentero xoser yê BDP kûno weçinitiş. Tunçî namzedîya xo banê (bonê) weçinitişê şaristanî de daye zanayene. Leyê Ferhat Tunçî de kî sereka beledîyaya Dêrsimî Edîbe Şahîn, serekê beledîyaya qezaya Pêrtage Kenan Çentîn û xeylê dêrsimijî bîy.
Ferhat Tunçî verê rojnamegeran de qisey kerd, va ke: “Ez no kar jê (sey) karêde rûmetin qebul kena. Berpirsîyarîya mina verêne layîkbîyayîşê nê tarîx û kulturî yo. Çi heyf o ke heta nika girêdayîşê problemanê Dêrsimî û yê kurdan hetê partîyanê sîstemî ra ame vîyarnayene, ame manîpule kerdene.
Wexto ke rastîya cayê ma nêameye çim, înan ceribna ke şarê ma bivurnê dûrî fîyê. Ez wazena bidîne dayene ke ma no proses de na rastîye parlamento de bîyarîme rojeva Tirkîya. Ez vana ke gerek merdim (mordem) goreyê tarîx, kultur, zon (ziwan) û îtîqadê Dêrsimî ra bigurîyo. Ez nika zaf kota heyecan, labelê nê rojanê ameyoxan de ma bi şarê xo ra pîya do şekîlêde bihişmet de bêrîme têlewe. Kes ci ra guman mekero. Wisar yeno Dêrsim rê, ma no wisar bi serkewtiş xemilnenîme. Ez vana, no wisar o îstîqbalêde rûmetin şarê ma rê bîyaro.”
Boka birêz Ferhat Tunç no weçînitiş de serfîraz bo. Ez wazena no şîroveyê xo de rastnuştene sero vindera: No demo peyînan de ez vînena zaf nuştoxê seke şima zî nuşto “problemanê Dêrsimî û yê kurdan … ” çekuya ke bi herfa vengin qedîna ra pey, yew herfa “y” ronenî eke no tewir nuştiş rast bo ma gereke herinda “problemê aye”, “porê ey” yan zî herinda “fikrê înan” de “problemê yaye”, “porê yey” û “fikrê yînan” bunusî, coka ez vana “problemanê Dêrsimî û ê kurdan…” nuştene dahîna rast o.