Şorişgero namdaro kurd Mazlum Dogan û birayê ey Delîl Dogan serê mezelanê xo de amey yad kerdene. Xeylê kesî dewa Demanî Dêrsim de no semed ra amey pêser. Uca (uza) de resimê Mazlum Doganî ame hewa nayene û ey ser o qisey bîyo. Goreyê îtîqadê Dêrsimî çilayî amey tafîştene û duwayê bi kurdkî amey kerdene.
Maya Mazlum Doganî Kebre Dogan qiseykerdişê xo de vatîbî ke wexto ke înan lajê (lazê) xo zîyaret kerdêne, înan besenêkerd ke Mazlum Doganî de qisey bikerê, çike kurdkî qiseykerdiş qedexe bî. “Zulm zaf bî, îşkence zaf bî, se vajîne? Çîyê ke înan lajê mi Mazlumî rê verê çimanê ma de kerdîbî, zerrîya ma kerdêne parçe-parçe.”
Pîyê Mazlum Doganî Kazim Doganî va ke her reyê ke înan Mazlum Dogan zîyaret kerdêne, o koma de bîyo, besenêkerdo ke pay ra vindero. “Reyê, Mazlum û panc (ponc) hevalê xo erzenê ‘hucre ya merdene’. Şodir ke beno, di hevalê ey mirenê û hîrê teneyî xeleşînê. Mazlum kî xeleşîno. Di teneyî semedê bêhewayîyera xeneqîyayê. Ez şîya Mazlum zîyaret kerd, o hîna no sebeb ra nalayêne. Eke mi o henî dîyêne, xo kerdo vîndî û qîrayêne va ‘Bêşerefî’. Eskerî amey. Ju (yew) eskerî waşt ke girmike bido mi ro, mi destê ey pêgirewt, la cinîya mi zirça va ‘Eke ti dana înan ro, ê kî zere de danê Mazlumî ro.'”
Zîyaretê Mazlum Doganî 2-3 deyan de qedîyayêne. Kazim Dogan nîya dewam keno: “Reyê mi ra va, ‘Êndî mi zîyaret mekerê, xo nîya telef mekerê. Çikê ez wazena, birayê mi Delîl teslîm mebo, noca (naza) megino, bimiro labelê noca (naza) megino. Ez muhîm nîya, çêyê (keyeyê) mi muhîm nîyo, her çî no milet rê feda bibo.'”
Mazlum Dogan serra 1955 de qezayê Dêrsim Dep de ame dinya. Fakulteyê perwerdeyî ra tepîya serra 1975 de Anqara de Unîversîteya Hacitepe de ekonomî ser o wend. Nê serran ra tepîya Mazlum partîyanê çepgiran de seba mesaleya şarê kurdan gureya. Serra 1979 de o ame eştene bi hepis, uca (uza) îşkenceyêde giran dî. 1982 de roja newroze de xo jê (sey) formê protestoyî hepis de veşna. Birayê Mazlum Doganî, Delîl Dogan, serra 1981 de verê banê (bonê) pîyê xo dewa Demanî de hetê eskeranê tirkan ame kiştene. Delîl Dogan kî deyîrbaz bî, kilama ey “Canê canê” hetê Şivan Perwerî ra ameybî vatene.
