Qata 3. yê banê (bonê) beledîyaya Dêrsimî cadeyê Moğultay Mahallesi Okullarî de bombaya plastîk a tîpê C4 ke bi (ebe) eyarê wextî dekerdîye bîye, ame dîyene. Ame zanayene ke bomba peroj roja dişemîye de ame eyarkerdene û sirf semedo ke enerjîyê pîlê mekanîzma xelisîya, bomba nêteqaya.
Bomba depoyê banê xizmetî de ame dekerdene. Şodir personelê beledîya, seba ke malzeme bigirewtêne, vejîyayê cêr û bomba ferq kerde. Mudirîya Asayîşî yê Wîlayetî bomba îmha kerde ke êndî (êdî) zerarê xo çin o, aye ra kî dot kutikanê sayekerdişê bombayan banê beledîya saye kerd. Derûdorê banî kî hetê polîsî ra ame cadayene û ban ame talkerdene. Seba ke bombaya dîyine nêameye dîyene, kuç û rayan tepîya ancîya (onca) amey rakerdene.
Sey (jê) netîce pêro pîya 250 gramm bombaya plastîk a tîpê C4 û A4 ameye dîyene. Na bomba roja dişemîye wextê perojî de ameye eyarkerdene, labelê semedo ke pîl xelisîya, nêteqaye. A roje banê beledîya de panelê BDP “Meseleya Kurde de Mewzûyê Muxatabîye û Otonomîya Demokratîke” ke serekê beledîyaya Dîyarbekirî Osman Baydemir kî tede beşdar bî, virazîyaybî. No panel de dorê 1.500 kesî beşdar bîy. Nika perso verên oyo ke kesî waşto Osman Baydemir bikişo ya ney.
Sereka beledîya Edîbe Şahîn no derheq de va ke: “Seba ferzkerdişê têkilîya çîyan-mîyan hîna zaf rew o. Peynîya peynîye de noca (naza) banê beledîya yo, çêberê (keyberê) ma 24 saetî rakerde yo. Seba ke ma nêzanenîme bomba key ameye dekerdene, girêdayîşê ci bi programê festîvale rast nîyo.”
Mudirîya Asayîşî da zanayene ke heta ke bomba laboratuar de nêameye analîzekerdene, kes nêşîkîno ser o çîyêde qetî vajo.
