Futbolbazo namdaro arjantînij Dîego Maradona şî heqîya xo. Efsaneyê futbolî vizêr 60serrîya xo de rîyê krîzê zerrî ra çêyê xo yê Tîgre de dinyaya xo vurnaye.
Maradona be ekîpa Arjantînî ra serra 1986î de Meksîka de û serra 1990î de kî Îtalya de bî şampîyonê dinya. Wextê xo de hêz û herbîya Maradonayî û teknîkê xo yê berzî o kerdêne bêemsal. Ewro o cayê xo leyê futbolbazanê sey Messî û Peleyî de cêno. Maradona Arjantîn û dinya de sey tewr namdaranê futbolî ra yeno hesibnayene. Bitaybetî Arjantîn de derheqê ey de yew kulturê qehremanî û efsaneyî esto. Reyê, turnuvayê Meksîka de Maradonayî duştê Îngilîstan de destê xo ya gol eştbî û naye ser nîya şîrove kerdo: “O destê mi nîyo, destê Heqî yo“.
Maradona serra 1960î de paytextê Arjantînî Buenos Aîres de ameyo dinya. Pîyê xo îtalyan û maya xo esilxirvate bîye. Maradona be hewt way û birayanê xo taxa feqiran de bî pîl. Heştserrîya xo de kewt ekîpa Estralla Roja û serrê ra tepîya kî vurna be Los Cebollitas. Wexto kilm de ey bala otorîteyanê futbolî ante xo ser. 1975 de lîgo yewin de transfere Argentînos Junîors bî. Uca panc sezonî kay kerd û her sezon kî bî qiralê golan. 167 maçan de Maradonayî 115 golî eştî. 1981 de transferê Boca Juniors bî. Ey ê sezonî de be 17 golan ekîpa xo arde şampîyonîye. Yew serre dima Maradonayî raya Barcelona û dime ra kî raya Napolî girewte.
Herçiqas ke Maradona futbol de serfiraz bî, problemê ey ê şexsî kî estbîyî. Semedê gurenayîşê kokaînî ra cezaya girse werde, Îtalya teriknaye û şî yew serre Sevîlla de kay kerd. Heta 2004î Maradona binê problemanê esrar û alkolî de nalayêne, kîlo girewt û xo ra kewt. Peynîye de xo reyna ard ra raye û dest be menajerî û antronerîya futbolî kerd. Tayê ekîpê ke Maradona tede menajer bî, nê yê: ekîpa Arjantînî ya neteweyîye, Al Wasl FC û Gimnasia de La Plata.
Panc domanê Maradonayî estê.
