Partîya Sosyaldemokrat a Swîsî SP Bern de parlamentoyê welatî de meseleya kurdan ser o ju (yew) konferans viraşt. No konferans de serekê SP Carlo Sommaruga, temsîlkarê partîya Tirkîya BDP yê Ewropa Faîk Yagizay, wekila kurd a Mêrdinî Emîne Ayna, parlamenterê swîsijî û xeylê kesê bînî beşdar bîy.
Panel de Carlo Sommaruga, Faîk Yagizay û Emîne Ayna qisey kerd. Emîne Ayna qeseyê xo de ard zon (ziwan) ke Tirkîya nika mecbur a ke vajo “kurdî estê”, labelê nêwazena ke heqê kurdan bido. Emîne Ayna va: “Kurdî no çax tewr zêde wazenê ke zonê (ziwanê) xo de perwerde bivînê. Heto bîn ra kî wazenê ke xo xoser îdare bikerê. Ma vînenîme ke ne parlamentoyê tirkî ne kî hukmat seba naye gamê erzeno. Ma ra vanê ke ‘ju (yew) milet û ju (yew) zon (ziwan)’ ra nêtexelînê. Yanî vanê ke tirkî ra teber qet zonêde (ziwanêde) bîn de perwerde nêbeno.”
Semîner qiseykerdişan ra tepîya bi (ebe) persanê beşdaran dewam kerd. Semîner de ame dîyene ke xeylê parlamenter û rojnamegerê Swîsî bi baldarî qayîtê nê pêserameyîşî kerd.
