Parlamentoyo tirk de reyna serebûtê nîjadperestî qewimîyayî. Parlamentera HDP Meral Daniş Beştaş ke qisey kerd, mesela ameya kurd û Kurdîstanî ser. Seke ma zanenîme, parlamentoyê tirkan de çekuya “Kurdîstan”î ameya qedexekerdene. Sîyasetmedar û hukmdarê Tirkîya ke tim vanê “ma duştê kurdan de nîyîme”, qiseyê înan reyna puç vejîyayî û nîjadperestî û dişmenîya ver bi kurdan vejîyaye meydan.
Ma kurd îme
Beştaş derheqê parlamentaranê tewqîfbîyayeban de qisey kerd va “No taw 11 parlamenterî statuyê xo kerdê vîndî, new parlamenterî hepisxane der ê û pêro nê parlamenterî -yew kes netede- kurd ê.” Boyna, Beştaş dîyar kerd ke çekuya sey “esilkurd” eslê xo de nîjadperestîya sivik a. Va ke “ma de ‘esil’ çin o, ma kurd îme!”
Wexto ke Beştaş nîşan de ke partîyê Tirkîya yê bînî dişmenîya kurdan kenê, parlamenterê tirkî nêverdayî ke a rehet qisey bikero. Naye ser o Beştaş înan ra va ke “Wa şêrê, keremê xo ra qezayanê kurdan de nîyadê ke nameyê kurdkî senî ameyê vurnayene. (…) Bustê Ehmedê Xanî, Ceylan Onköl, Ugur Kaymazî ameyê rijnayene. Nê domanê kurdî bîyî! Nika qayumî her çîyo ke kurd û kurdkî yo, pêrune danê we.”
her çîyo ke kurd û kurdkî yo, danê we
Nê qiseyan ser o serekparlamenter Îsmaîl Kahramanî çekuya “kurde” qebul nêkerde. Bî hêrsin, persa “Nê qezayê kurdî kotî yê?” Labelê Beştaş cewabêde rind da ci va ke “Ez ke kurd a, qezayê kurdî kî yew realîte yê. Ma canêverdanîme ke no red bibo!”
