Yew û nêm hewte newroz ra ver, şaristanê Dîyarbekirî hazirîya newroze keno. Şahîye emser binê sloganê “Êdî bes o, rayber Apoyî rê Azadî” yena viraştene. Tede HDP, DBP, DTK û KJA ra endamî do beşdar bê. Derheqê prosesê aştîye de mesajo ke Ocalan do bido, bala kurdanê vakurî anceno. Ame waştene ke Ocalan mesaj pê vîdeo bido, la mesele hîna qetî nêbîya.
Texmîn beno ke emser 3 mîlyonî kesî yenê newroza Dîyarbekirî. Çar parçeyê Kurdîstanî û dinya ra xeylê meymanî silayîye girewte. Nînan tede serekkomarê Fransa François Hollande, serekwezîrê Yunanîstanî Aleksîs Tsîpras, serekkomarê Îraqî Fuad Masum, serekê Herêma Federal a Kurdîstanî Mesûd Barzanî, hemserekê PYD Selîh Muslîm û Asya Abdullah, serekê YNK Celal Talabanî, ser o kî partîya Goranî û kantonanê Rojawanê ra temsîlkarî. 500 partîyanê Afrîkaya Başûrî, Amerîkaya Başûrî, Ewropa, Asya û Rojhelatê Mîyanênî ra kî selahîyetdarî ameyî dawet kerdene.
Bi desan hunermendê kurdî beşdarê newroze benê, sey nimûne Koma Niştîman, Grûbe Rojava, Hozan Comert û Suavî. Hunermendo namdar Kawa vîst serran ra tepîya cêreno ra welatê xo.
Duştê texdîdê Paketê Asayîşê Zereyî de, şaro kurd do kincanê gelêrî de beşdarê newroze bibo.
