Statîstîkê 2014 yê Serekîya Dezgehê Statîstîkan ê Tirkîya (TÜIK) ra gore qezaya Tirkîya ke tede serra zewecîyayîşî tewr berz a, Dêrsim* o. Mîyankî, merdimî 29,1 serran de, cinîkî kî 26,4 serran de zewecînê.
Texmîn beno ke sebebê ke Dêrsim de serra zewecnayîşî hende berz a, perwerde de girêdaye yo. Statîstîkanê Tirkîya de dêrsimijî perwerde de cayanê corênan gênê. Yewna sebeb o yo ke êdî Dêrsim de keyeyî benê tenêna qijkek, komel sey verî nîyo. “Keyeyê dendikî” ke bitaybetî şaristanan de ciwîyenê, weşîya xo hîna modern ramenê. Perwerde û karîyerê ciwanan kî zewacî ra ver muhîmîye vînenê.
Yew faktoro muhîm kî o yo ke duştê qezayanê bînan de Dêrsim de hîna zaf kênekê azebî unîversîteyan de wanenê yan wayîrê meslekan ê. Heta ke zewecînê û domanan kenê pîl, resenê 30serrîya xo.
* Not: Qezayê Komara Tirkîya û mintiqayê Kurdîstanê Vakurî yew nîyê. Qezaya “Tuncelî” mintiqaya kurdan Dêrsim ra tenêna qijkek o. Statîstîko corên tena sînoranê qezaya “Tuncelî” esas gêno.
