Şarê Dêrsimî ewro verba awbendanê (barajan) ke dewleta Tirkîya Dêrsim de wazena ke bivirazo, xeylê sûkan de kombîyayîşan de amey pêser. 250 kesî verê banê AKPî awbendan protesto kerdê.
Verê çêberê AKPî nuşteyî amey wendene. No pêserameyîş de cêncan pankarê sey (jê) “AKP Munzur de xeniqîno”, “Munzur tenge der o, Dêrsim xo ser o” eştî.
Hunermend Ferhat Tunc kî dest da no pêserameyîş.
Nameyê grûbe ra Hasan Şenî qisey ard zon (ziwan) û vat “Tirkîya wazene ko zîyaranê ma ser barajan virazo, nîya wazene ke tebîetê ma bixeniqnê, zîyaranê ma, îtîqatê ma binê awe kerê. Awa Muzirî îtîqatê ma yo, ma nêverdeme ke Tirkîya nê barajan xo bivirazo”
Qiseykerdoxo bîn kî va “Na dewlete nêwazena ke Dêrsim xizmete bido, nê wazenê ke Dêrsim xirabin kerê, bi (eve) barajan keso ke Dêrsim de mendo, teber kerê. Nê wazene ke na reyê Dêrsim biqedênê.”
Vengê ekspertan ra gore kotî ke awbendan bivirazê, şarê ucayî (uzayî) koç keno, derûdor beno xirabin. Terteleyê 38î ra tepîya nika kî sira terteleyo ekolojîk der o. No sebeb ra dewleta Tirkîya wazena ke 20 barajan bivirazo. No wisar di barajê bînî yenê viraştene.
Vatena cinîkêda kokime ma xo rê sey (jê) mîsal bicêrîme: “Ma pîyanê xo qirkerdîş ra besenêkerd ke bixelesnîme, hama mezelê dînû, herda dînû nêverdeme ke binê awe de bimano”
