Ilhami Sertkaya – EZ U MAYA MI

‘KILAMA ŞİLANE’ de, derheqê maya xo ra, tayê mı nusno. Waxto ke mı no roman nusna, qey mevaci; Çend reyi ez berba. Şıma nêzanenê sebebê berbayena mı.
Ez tayê, no sebeb ra berba, qey zuri bıkeri?
O kıtab, serê ‘fantaziyê’ mı ra nênusiyo.
Çiyê ke mı viyarne, çiyê ke mi diyê, rasterast sere inan ra nusiyo o roman.
Derg mekeri, qesê mı, zê derdê mı, derg ê.
17 seri ra dıme, ju sodır, ez mêydanê tiyariyê Amsterdami de ra, seba ke maya mı yêna. 17 seri ra tepya, ez adıran de derbaz biya, nêmerda, nıka satêna maya mı ‘azmên dera’ yêna cêr, tiyare de pêya bena. Qoridorê mêydanê tiyari, ebe zav u zêç, ebe cêniyan u mordeman pır o, sıxlet o. Destê tayine de, guli est ê. Çımê pêrune, se ke çewero gırs u camın ra zeleqiyê.
Çı esto, o ca de vecino.
Omıd, o ca de vecino, heskerdene, o ca de.
Sebır, o ca de ‘teqeno’, hesrete o ca de qedina.
A hesreta 17 seri.
Zerê mı, biyo zê çemê Muzıri, ‘çılqeno’.
Ez vaci ‘sed’, şıma vacê ‘hirıs’ sere wa ke, çımê mı o çewero camın de mendi bi.
Rêbiyê tiyari, ju be ju, vecinê nıka.
Waxto ke çewer biyêne ra, zerê mı de ‘’pumê kori’ veciyêne tı vana.
Destê mı lerzêne, çımê mı biyêne sıst.
Ez maya xo bê şık, nas kena.
Mordem cayê hêlina emrê xo se nas nêkeno?
Ma maya mı? A ki mı nas nêkena?
Maya şıma, şıma nas nêkena?
Şıma nıka na persa mı ra hunê heni niyo?
Tam o cawo ke şıma hunê, ez o ca de berbena nıka.
Maya mı veciye, ez şiya lewe, aye mı ra, ruyê xo çarnê.
Ez dıma ruyê aye ra, zê araye çerexina.
Maya mı, mı nas nêkerde, şıma naye fam kenê?
Şilane lêwê mı de ra.
Şılanê u maya mı vırare ardi jumıni ra. Ez, zê domanê ‘bê maye’, bê kes, bê wayir, budela, bı bela, bı tofan, tenya menda.
Şilane maya mı ra va ke;
-Dayê, tı nê mordemi nas nêkena?
Maya mı va;
-Nê, İlhamiyê mı koti de ro?
Şılane, ebe nê vati, berba, bınê hêstıranê çıman de va ke;
-DAYÉ NO WO! NO İLHAMİYÉ TO WO
Zıngıniye veciya maya mına rebene de.
-Wi! Lacê mı, cigera mı, tiya!
-Heya dayê ez! Ez a dayê, ez lacê to, ez İlhamiyê to wa dayê!
Pepuge, o waxt, vengê xoyê sed seran, da maya mı va ke;
-DE BIBERBE! SEBA KE TO LACÉ XO NAS NÉKERDO, BIBERBE MIRDİYA XO
Pepuge, koyanê ma de amebiye no mêydan, mabênê sıxletiya insanan de, wendêne.
Ez u maya xo, ma kewtime vırara jumıni. Hêstirê çımanê ma, vırara jumıni ra rışiya, rışiya. Sarê mı kerde serê sênê xo, se ke na dınya ‘puşte’, ra şeveknêne, nêwastêne rêyna kes mı vırara aye de bıvısno.
Ebe dı destanê xo, porê mı, ruyê mı, bı hesreta 17 seri mıştı kerdêne, dılopê çımanê xo, rışiyêne serê mı ra.
É dılopê ke, hitiye u germiya inan ra, ez hesret menda.
Berbayime, berbayime.
-Bes o dayê meberbe
-Vındê! Vındê qarçê mı mekerê vındê!
-Dayê bes o, meberbe
-Dayê kor bo to ra, dayê qedayê to bo, mı İlhamiyê xo, cigera xo nas nêkerd, vındê şıma ra vana!
Bınê qaytkerdena sıxletiye de, dılopê maya mı, serê betonê mêydani ra rışiyêne.
Destê mı lerza, zerê mı lerza, ‘hard lerza azmên lerza’.
Dıme ra se bi?
Derg o derg, sarê şıma medacni ez.
Rêyna ê vatê ma vacıme u na sate ita de bıqedênıme;
‘’A KE MA DİYA, KESİ NÉDİYA, BIRA-BIRA!’
Bıra, wayê, ‘ A KE MA DİYA……’’
İlhami Sertkaya
10-3-2010
‘KILAMA ŞİLANE’ de, derheqê maya xo ra, tayê mı nusno. Waxto ke mı no roman nusna, qey mevaci; Çend reyi ez berba. Şıma nêzanenê sebebê berbayena mı.
Ez tayê, no sebeb ra berba, qey zuri bıkeri?
O kıtab, serê ‘fantaziyê’ mı ra nênusiyo.
Çiyê ke mı viyarne, çiyê ke mi diyê, rasterast sere inan ra nusiyo o roman.
Derg mekeri, qesê mı, zê derdê mı, derg ê.
17 seri ra dıme, ju sodır, ez mêydanê tiyariyê Amsterdami de ra, seba ke maya mı yêna. 17 seri ra tepya, ez adıran de derbaz biya, nêmerda, nıka satêna maya mı ‘azmên dera’ yêna cêr, tiyare de pêya bena. Qoridorê mêydanê tiyari, ebe zav u zêç, ebe cêniyan u mordeman pır o, sıxlet o. Destê tayine de, guli est ê. Çımê pêrune, se ke çewero gırs u camın ra zeleqiyê.
Çı esto, o ca de vecino.
Omıd, o ca de vecino, heskerdene, o ca de.
Sebır, o ca de ‘teqeno’, hesrete o ca de qedina.
A hesreta 17 seri.
Zerê mı, biyo zê çemê Muzıri, ‘çılqeno’.
Ez vaci ‘sed’, şıma vacê ‘hirıs’ sere wa ke, çımê mı o çewero camın de mendi bi.
Rêbiyê tiyari, ju be ju, vecinê nıka.
Waxto ke çewer biyêne ra, zerê mı de ‘’pumê kori’ veciyêne tı vana.
Destê mı lerzêne, çımê mı biyêne sıst.
Ez maya xo bê şık, nas kena.
Mordem cayê hêlina emrê xo se nas nêkeno?
Ma maya mı? A ki mı nas nêkena?
Maya şıma, şıma nas nêkena?
Şıma nıka na persa mı ra hunê heni niyo?
Tam o cawo ke şıma hunê, ez o ca de berbena nıka.
Maya mı veciye, ez şiya lewe, aye mı ra, ruyê xo çarnê.
Ez dıma ruyê aye ra, zê araye çerexina.
Maya mı, mı nas nêkerde, şıma naye fam kenê?
Şilane lêwê mı de ra.
Şılanê u maya mı vırare ardi jumıni ra. Ez, zê domanê ‘bê maye’, bê kes, bê wayir, budela, bı bela, bı tofan, tenya menda.
Şilane maya mı ra va ke;
-Dayê, tı nê mordemi nas nêkena?
Maya mı va;
-Nê, İlhamiyê mı koti de ro?
Şılane, ebe nê vati, berba, bınê hêstıranê çıman de va ke;
-DAYÉ NO WO! NO İLHAMİYÉ TO WO
Zıngıniye veciya maya mına rebene de.
-Wi! Lacê mı, cigera mı, tiya!
-Heya dayê ez! Ez a dayê, ez lacê to, ez İlhamiyê to wa dayê!
Pepuge, o waxt, vengê xoyê sed seran, da maya mı va ke;
-DE BIBERBE! SEBA KE TO LACÉ XO NAS NÉKERDO, BIBERBE MIRDİYA XO
Pepuge, koyanê ma de amebiye no mêydan, mabênê sıxletiya insanan de, wendêne.
Ez u maya xo, ma kewtime vırara jumıni. Hêstirê çımanê ma, vırara jumıni ra rışiya, rışiya. Sarê mı kerde serê sênê xo, se ke na dınya ‘puşte’, ra şeveknêne, nêwastêne rêyna kes mı vırara aye de bıvısno.
Ebe dı destanê xo, porê mı, ruyê mı, bı hesreta 17 seri mıştı kerdêne, dılopê çımanê xo, rışiyêne serê mı ra.
É dılopê ke, hitiye u germiya inan ra, ez hesret menda.
Berbayime, berbayime.
-Bes o dayê meberbe
-Vındê! Vındê qarçê mı mekerê vındê!
-Dayê bes o, meberbe
-Dayê kor bo to ra, dayê qedayê to bo, mı İlhamiyê xo, cigera xo nas nêkerd, vındê şıma ra vana!
Bınê qaytkerdena sıxletiye de, dılopê maya mı, serê betonê mêydani ra rışiyêne.
Destê mı lerza, zerê mı lerza, ‘hard lerza azmên lerza’.
Dıme ra se bi?
Derg o derg, sarê şıma medacni ez.
Rêyna ê vatê ma vacıme u na sate ita de bıqedênıme;
‘’A KE MA DİYA, KESİ NÉDİYA, BIRA-BIRA!’
Bıra, wayê, ‘ A KE MA DİYA……’’
İlhami Sertkaya
10-3-2010