Şaristanê Kurdîstanî Xaneqîn de ke hîna resmî parçeyê Herêma Kurdîstanî nîyo, hêrişê întîharî ra dime dorê 30 kesî merdî. Bi desan kesî kî bîy dirbetinî.
Goreyê melumatan ra, hêrişê întîharî roja dişemîye yew mîtîngê YNK de qewimîya. Peqayîş verê banê YNK de bî. Cîya-cîya çimeyan ra gore mabênê 20 û 30 kesan de canê xo day, dorê 30 û 50 kî bîy dirbetinî. Beşdarê mîtîngî ameybî têlewe ke televîzyon ra qayîtê raydayîşê sekreterê pêroyî yê partîye Celal Telebanî bikerê.
Îraq de meşte weçînitişê parlamentoyî yeno kerdene, coka no taw hêrişî benê zêde. Goreyê xeberanê hêzanê asayîşî yê Xaneqînî, tedbîrê çîpî amey girewtene ke boyna hêrişî ca mêrê. Suîkast hetê YNK û PDK ra ame rexne kerdene. Serekê Herêma Kurdîstanî, Mesûd Barzanî, va ke no hêriş ceribnayîşê teror û tersnayîşê şarê kurdan o. “Gerek terorîstî bizanê ke derd û ganfîdayîye tena yewîya şarê ma tenêna kenê pêt. Bi destê Heqî, peynîye de ma do serfiraz bîme!”
