Destê edîtorî ra:
Weçînitişê beledîya yê Tirkîya û Kurdîstanî xeylê komplo, propagandaya qilêrine û gureyanê çetinan ra dime qedîya. Skoro peyên ra gore AKP zafêrîya şaristananê Tirkîya de, BDP kî zafêrîya şaristananê Kurdîstanî de serfiraz vejîyaye. Partîya kemalîste CHP no weçînitişo 4. de kî besenêkerd ke duştê AKP û BDP de bivejîyo. Na rastîye ancîya musnena ke îstîqbalê yew şarî bi îdeolojîya kane ney, la bi sîyaseto rasyonel û hemdem yeno ramitene.
AKP bi sîstemê xo yo pêt û organîzekerde no weçînitiş de kî musna ke şar êdî îrtîbatê xo pê partîyanê rastgiranê kanan sey CHP û MHP nêano. Heta ke yew partîya newîye vi çareyê problemanê rojane û hemdem mevejîyo sahneya sîyasetê Tirkîya ser, AKP hîna 100 weçînitişan de kî duştê CHP de serkewte vejîna. Çike zemanê Kiliçdaroglu û partîya xo vîyart, bi îdeolojîya xo ya kemalîsta faşîzane ra êdî waştişanê ewroyî rê cewab nîya, hetta AKP ra tenê peyser a.
No weçînitiş ancîya musna ke BDP se kena wa bikero a besenêkena bibo partîya pêro Tirkîya, netîceyan zelal nîşan da ke BDP partîya Kurdîstanî ya û na rastîye henî kî manena. Gerek BDP êdî naye qebul bikero û hêzê xo sîyasetê Kurdîstanî ser o konsantre bikero. 11 şaristananê kurdan de BDP rayî xo rê girewtî. Labelê maceraya bi HDP kar ra zêde zerar ard înan ser, gerek na enerjî êdî seba nê meseleyan mêro îsref kerdene. Mudaxaleyê sîyasetê çepgiranê Tirkîya hem sîyasetê kurdî rê hem kî sîyasetê çepgiranê tirkan rê zerar dano. Ganî çepgir û demokratê tirkî çareyê xo bi xo bivînê. Eke nêbo, 1 % ra zêde ray nêcenê. Herçiqas ke sîyasetê kurdî raya xo ra xoser şêro, hende kî beno serkewte.
Herçiqas ke Dêrsim de BDP serfiraz vejîya, uca de kî yew ecêbo pîl keweno çiman ver. Tarîxê Tirkîya de reya verên a ke yew partîya komunîste besekerd yew beledîya bicêro. Şaristananê karkeranê sey Îstanbul ya kî Zonguldak de ney, la qezaya Dêrsimî Pulur, qezaya Sey Rizayî de, qezaya ke tede yew karker û yew fabrîka çin a, a partî uca na beledîya girewte. Nameyê na partîye “Partîya Komunîst a Tirkîya” ya û qet eleqeya xo bi tarîx, kultur û ziwanê Dêrsimî çin a. Pekî çitur beno ke yew partîya komunîste yena yew şaristano ke hîna hetê sîyaset û ziwanî ra azad nîyo, propagandaya komunîzmî kena? Dinya û tarîxê komunîzmî de mîsalêde bîno nîyanên çin o. No asîmîlasyono sûr ê Tirkîya yo, gerek BDP na çewtîye rind fehm bikero. Dêrsim de no kay çend reyî ame kay kerdene û heta nika Dêrsim hîna besenêkerd ke xo na nêweşîya îdeolojîyan ra bixelisno.
Wezîfeya BDP ya ke êdî sîyasetê xo seba ziwan, kultur û xelişîyayîş rast bikero.
