Rejîsoro kurd Hîner Salem fîlmanê xo yê serkewteyan “Vodka Lemon” (2003) û “Kîlometre Zero” (2005) ra dime bi filmêde newe “My sweet Pepperland” emser keweno festîvalê fîlman ê Cannesî. Fîlmo newe yê Salemî filmê yewin ê westernî (yanî fîlmê kovboyan) yo ke Kurdîstan de ca gêno. “My sweet Pepperland” (Welatê mino şîrino tuj) hîkayeya yew pêşmerga yo ke wextê Sedam Huseyînî de polîs bîyo. Fîlm têwertekerdişê komedî û drama yo. Fîlm hem bi kurmanckî (kirdaskî) hem kî bi kirmanckî (zazakî) yo.
Fîlm de Baran, yew qehremanê cengê xoserîye, nika paytext Hewlêr de sey qumandar gureyeno. Seba ke ceng qedîya, Baran cayê xo yew komelo aşt de besenêkeno bivîno, coka fikirîno ke polîs terk bikero. Labelê herinda îstîfa de Baran dewêda qijkeke rê tayîn beno. A dewe kî yew cayo bê qeyde û bê huqûq mîyanê sîndoranê Îran, Tirkîya û Îraqî der a ke merkezê esrar û qaçaxçîyan o. Wexto ke Baran yeno dewe, qebul nêkeno ke Axa Azzî rê hurmetê xo bimusno. Azzî axa û serdarê pêro aktîveteyanê îllegalan ê dew o. Dewe de Baran rastê malime Govende beno ke hetê dewijan ra ameye teber kerdene. Sey Baranî, Govende kî huqûq û rastîyêda newîye temsîl kena: qeyd û rastîya Dewleta Kurdîstanî.
[divider] [/divider]
Fîlm: My Sweet Pepperland
Ziwan: Kurdkî (Kirdaskî, Kirmanckî)
Tarîxê Vejîyayîşî: 22. gulane 2013 (Fransa)
Rejîsor: Hîner Salem
Nuştoxî: Hîner Salem, Antoîne Lacomblez
Kaybazî: Korkmaz Arslan, Golşifteh Farahanî, Suat Usta
