Viraştoxê tomofîlan BMW emser Çîn de xeylê erebeyî rotî. Eke henî dewam beno, Çîn seba BMW beno pîyaseya tewr girse. Bitaybetî modelê 5 yê BMW Çîn de xeylê kar kerd. BMW ra gore no model nika Çîn de mintiqayanê muhîman de peyda bîyo. Rotişê nê modelî bi zêdîyayîşê 61,8%, yanî bi 4925 tomofîlan, bîyo. DYA de BMW kî 23222 tomofîl rotî muşterîyanê xo, na pîyase bi 12,6% bîye girse.
Analîstanê şîrketê Morgan Stanley ra gore BMW hîna posîtîf gurîno. Par xeylê problemê viraştoxanê tomofîlan estbîbî, nika BMW raya pête ra şono. Çîn ke mebo, no zêdîyayîşo girs kî nêbîyêne. Peynîya serra 2010 de BMW pêro tomofîlanê xo ra 60% rotê bi Çîn. Muşterîyê çînijî erebeyanê girsanê luksan ra hes kenê, aye ra gore karê BMW uca (uza) berz o.
Pêro pîya BMW Çîn de 50463 tomofîl rotî, wa welatê xo de Almanya de 59313 teneyî yê. Par Çîn de nêmeyê na hûmare ameybî rotene. Nika henî aseno ke teredutê ekonomîya Çînî bîyê vîndî. Heta nika pîyaseya tewr muhîm a BMW Amerîka bîye. Uca (uza) 70657 teneyî erebeyî amey rotene. Îhtîmalêde girs ra Çîn şîkîno pîyaseya juyine (yewine) bibo.
