Dewleta ma ke bibîyêne

Şima zanenê manaya dewlete çik a?

Ma manaya dewletbîyene rind nêzanenîme, coka no handayê bela û qotik yenê sareyê ma. Ma ke muhimîye û manaya dewletbîyene bizanitêne, tirkî hata nika ebe ma kay nêkerdêne. Ma ke manaya dewletbîyene bizanitêne, tayê kurdê ke dinya aleme ra dewletê wazenê, tenya ma ra nêwazenê, înan rew ra vengê xo birnêne.

Dewleta ma ke bibîyêne, Parîs de hîrê cinîyê ma nêameyêne kiştene.

Dewleta ma ke bibîyêne, trajedîya Helepçeyî nêbîyêne (Endî o ca de reyna Helepçe nêbeno, çike dewlete esta).

Dewleta ma ke bibîyêne, qerarê sîyasetê dinya de, MYde  kursî û temsîlkarê ma zî bîyêne, seba ke çîyê biameyêne şarê ma ser o, o ca de ebe dinya pîya qerar girotêne.

Dewleta ma ke bibîyêne, şarê ma binê nameyê “meçhulanê nedîyaran” nêameyêne qir kerdene.

Dewleta ma ke bibîyêne, no nuşte nênusîyêne, binusîyêne zî, bi mîlyonan wendêne. Seba ke dewleta ma çin a, no nuşte henî sey domano sêwî kişte ra maneno.

Dewleta ma ke bibîyêne, welatê ma de hondayê şelavî (dalqavux) dewleta tirke nêvecîyêne.

Dewleta ma ke bibîyêne, qorê qerar û destûrê polîs û qanûnê tirkan ney, goreyê xo qerar dêne.

Dewleta ma ke bibîyêne, sodir û şan ma fekê Erdoganan ra çi qesa vejîno, filan kes vano çi, bêvan kes “naye va”, ey naye va,”no mordem rind vano”, ebe nê kayan mijûl nêbîyêne, mabênê xiraban de rindan ra nêgêrêne.

Dewleta ma ke bibîyêne, rojeva welatê ma ebe medyayê tirkan, şanikê înan, qanûn û şovmenê înan, ebe palyaçoyê ma yê ke xizmetê vateyê tirkan der ê, Anqara kay nêkerdêne, ma zî waxt û demê xo seba nê çîyanê xapnayoxan xerc nêkerdêne.

Dewleta ma ke bibîyêne, ma nîya Parîs ra bige, heta Awusturalya vila nêbîyêne, welatan û kuçan de, sîndoran û sûkan de, ge-ge nêkişîyêne, na hesrete, no xem, no derd û merez ser o, meyîtê ma verba welatî reyna bi destûrê memuanê tirkan bi zor û zahmet nîya oxir nêkerdêne.

Dewleta ma ke bibîyêne, dewleta tirke hem ma nêkiştêne, hem zî meyîtanê ma ebe kontrol û konvoyanê xo nêkerdêne.

Dewleta ma ke bibîyêne, Kemal Kiliçdaroglu, Metîneroglu ma ra nêvecîyêne, qirkerdoxê ma Atatirk nîya eşkera nêseveknêne, Dêrsim de zî handayê reyî nêgirotêne. Çewlîg de, Mûş de, Erzingan de, Xarpêt de, Meletî de, Dîlok de, Semsur de, Riha de, Erzirom de, Dadaş û Gakoyî, Riza Doganî ebe ma nîya kay nêkerdêne, AKP nêvecîyêne.

Dewleta ma ke bibîyêne, Hasîp Kaplanî “sayeya ma de bayraqa tirke nê cayan de berz vindena” nêvatêne û ebe nê vateyê xo zî şerm kerdêne. Televîzyonan de, wayîrê kompleksê xirabî, seke ma suçdar îme, ebe nê kompleksî nêkewtêne binê tesîrê vate û mantiqê înkarcîyan û qirkerdoxanê ma, seba ke bikuyê çimanê înan, çerçeweya mantiqê înan de qesî nêkerdêne.

Seba ke dewleta ma çin a, pêro fek hîra û qaşo sîyasetmedarî, qaşo roşnvîrî û vateyê qaşo demokrasîye û aştîye, seba ke ma bê dewlete bimanîme, nîya pê kar nêardêne. Statuyê ju şarî ke çinî bo, kamîya ju şarî ke serbest nîya, ju şar ke wayîrê tayînkerdena qederê xo mebo, kamcî demokrasîye, kamcî aştîye peyda bena? Binê qanûn û huqûqê înkarê ma de, binê bayraq û bandura qetilkerdoxanê ma de, bine amîr û memuranê înkarê ma de, bine ordî û qereqolanê kolonyalîstanê ma de, kamcî aştîye, kamcî demokrasîye peyda bena?

Faydeyê hazar analîzan çin o. Di dewletê Arnawudîstanî, dewleta Andorayî, dewleta Lûksembûrgî, dewleta Qibrisî, dewleta Fîlistînî, pêro pîya qasê leteyê nufusê ma yê, şima zanenê? Înan rê, dinyaya aleme rê dewlete adet, ma rê qey bibo tomet? Guna ma çik a?

Vanê ke Atatirkî vato, “Ez belayêda henêne bîyarî şima ser ke wa tornê şima zî gerek mi ra hes bikerê.” Willayî xelet zî nîyo. Belayêda henêne ama sareyê ma ser ke na dinya de binê bandura ju dewleta kulistire de tenya ma mendîme. Dewletbîyene dînyaya aleme rê şekir û şîrin o, ma rê axû yo, nêwerîno ti vana. Sebeb? Sebeb, dewlet nêbîyena ma wa. Eger ke dewleta ma bibîyêne, nê belayî nêamêne sareyê ma. Ma kişenê, meyîtê ma binê otopsîyanê xo de vîyarnenê. Bi raporanê amîr û memurê înan meyîtê ma kunê mezele. Serê kemeranê mezelanê ma de bi destûrê înan çend çekuyan nusenîme. Weşîya ma û merdena ma binê bandura înan der ê. Ma welatê xo de esîrê prensîb, qanûn û qaydeyê dewleta tirkan îme. Kotî de se kenîme, gerek memurê înan qerar bido. Şima hêga roşenê? Bar kenê cayê ra şonê?Cayê de keye virazenê? Zewecînê? Cayê de kar vînit xebetînê? Seba nînan ebraqî lazim ê? Gerek ê destûr bidê. Seba ke dewleta ma çin a, kotî û kamcî welat de benîme bibîme, pêro dewlet û qanûnê înan ma, goreyê qanûn û dewleta tirke hesibnenê, goreyê hemwelatîyanê dewleta tirke hesibnenê. Seba eleqedarîya welatê ma her kes ma ruşneno balyozxaneyê dewleta tirkan. Şarê ma mecbur maneno ke şoro balyozxaneyê tirkan, kar û barê xo yê pasaport û burokrasîye  gerek o ca de virazîno.

Dewleta ma ke bibîyêne, her het ra qederê ma binê bandura dewleta tirke de nêbîyêne.

Dewleta ma ke bibîyêne, bi hesabanê qijkekan ney, seba rind kerdena, raver berdena qederê şarê xo ra mijul bîyêne ma.

Dewleta ma ke bibîyêne, ez nika ju dewe ya zî mezraya welatê ma de bi zonê ma mamostatîye kerdêne.

Dewleta ma ke bibîyêne, mi waştêne ez şiwane bibî, wa vêşan û belengaz bî, qet ke mebo temsîlkaro ke mi seba derdê xo sare dêne piro, yê ma bî. Xirabîya ke mi ci ra gerre kerdêne, memurê ma bî. Ez mecbur nêmendêne ke bi zonê tirkî, bi prensîbê qanûn û memuranê înkarî ra, ebe quretîya înan ra muxatab nêbîyêne.

Dewleta ma ke bibîyêne, teyara û eskeranê tirkan ser û verê ma de ma qir nêkerdêne, nêkiştêne, sûk û şaristananê ma de çimê ma nêginêne înan ra. Seba ke kiştena ma “normal” a, ebe nê mantiqî Amed de, Meletî de teyarayan seba ma bombe kerdêne, asmênê welatê ma de nêbîyêne. Medya û televîzyonê înan de ma na qirkerdena xo nîya seyr nêkerdêne. Tirk ebe “ît û MÎTê xo” ebe ma qaşo aştîye kay nêkerdêne, gonîweranê tirkan nîya rehet bi kamîye û zonê ma kay nêkerdêne.

Dewleta ma ke bibîyêne, Huseyîn Ayguno dêrsimijo ke Parîs de şîbî tezayîya hîrê cinîyan, nîya hetê înan ra nêkewtêne binê tomete. Seba ke dewleta ma çin a, seba ke Huseyîn Aygun endamê parlamentoyê ma nîyo, yê înan o. Tezayîya ey ra nîya hesab pers nêbîyêne.

Kes xo mexapno, kes ma zî mexapno: heta ke dewleta ma mebo, qederê ma yê bindestî nêvurîno. Eger ke dewleta ma bibîyêne, xalê min û apê min ê belengazî sey bi hezaran kesê belengazî hetê çawuş û zabitê kulistîrê tirkan de qereqolan de, dewan de, kuçan û şaristanan de nêkişîyêne, qetilî zî nîya serbest û rehet nêgêrêne.

Dewleta ma ke bibîyêne, Hîzbullah û qorîcîyî ebe dewleta tirke peyda nêbîyêne, şarê ma qir nêkerdêne.

Kenan Evrenî ra rojê ju rojnamegerê tirkî seba Kurdîstanê Başûrî pers kerd va ke:

– Paşa, seba ke eskero tirk bikuyo vakurê Îraqî, fikrê to çik o?

Kenan Evreno ke gonîwer o, la rastîyê zî zanano, naye va:

– Ney! Endî herey o, o ca de endî dewlete virazîya!

Dewlet bîyene na wa, şima fam kenê?

Eger ke dewleta ma bibo, bibîyêne, pêro belayê ke seba bê dewlet mendena ma serê ma ra peyda benê, qedîyêne, nêbîyêne, nêbeno.

Dewlet bîyene statu yo. Statu name, kamîye, heq û huqûqê şarî, hetê pêro dinya û dewletan de nas kerdene û qebul kerden a. Dewleta to ke çin bo, kes to nas nêkeno, heq û huqûqê to zî nas nêkenê.

Ax! Dewleta ma ke bibîyêne… Ya dewlete bîyene, ya zî binê bandura dewleta tirke de qederê ma bi koletîye ramitene!

Ma hîna qalê çi kenîme, ebe çi waxtê xo xecelnenîme, tew….

Wele ro ma ra bo!