Rojnameyê Îsraîlî Haaretzî hûmara xoya peyêne de nuşt ke cayê ke tede kurdî ciwînê, uca sîndorê xerîta yê stratejîkî newe yenê xêz kerdene û mîyanê naye de “Kurdîstano ke reseno derya” esto.
Nuşte de ke hetê profesorê Unîversîteya Tel Avîvî Prof. Ofra Bengîoyî ra amade bî, meselaya kurdan dormeyê serebûtanê ke Kurdîstanê Rojawanî de qewimîyene, analîz beno. No analîzê xo de Prof. Bengîo keno eşkera ke kurdê Kurdîstanê Rojawanî îmkananê xo rind kay kenê. Bi stratejîyêda biaqile kurdî resay pozîsyonanê stratejîya muhîme. Na game ra kurdê rojawanî tena zereyê Sûrîye de ney, kurdanê Tirkîya rê kî mesajo muhîm danê. Heto bîn ra kî kurdê rojawanî seba karê xo bi Kurdîstanê Başûrî ra benê nêzdî. Haaretz ra gore kurdî sîndoranê xo heta Deryaya Sipîye kenê hîra.
Seba ke sîndorê werteyê Tirkîya û Kurdîstanî 400 kîlometreyan ra bîy 800 kîlometreyî, Tirkîya naye ra qisawet ancena. Sîyaseto ke hukmatê Tirkîya heta nika duştê PKK de ramit, beno tenêna zor. PKK kî bi Kurdîstanê Rojawanî bena tenêna pête.
Dewamê nuşteyî de bellî beno ke kurdî sîndorê kanî ke hetê hêzanê serkewtoxan ê Cengê Yewin ê Cîhanî amey viraştene, xo vîr ra kenê û herinda înan de şansê xo kay kenê. No şans de kî resayîşê Kurdîstanî bi Deryaya Sipîye esto.
