Cigêrayox û nuştox Îsmaîl Beşîkçî munaqeşanê rojanê peyênan ser o, eke kurdkî wendegehan de bi hewaya weçînitişan bêro wendene, fikrê xo da zanayene. Beşîkçî ra gore seba şarê kurdî ziwanê kurdkî weçînite nêbeno, labelê seba wendekaranê tirkan dersa weçînitîye bena.
Beşîkçî nîya dewam kerd: “Ziwanê yew şarî ke nusûfê xo 20 mîlyonî ra zêde r’ o, seba ey dersa weçînite nêbena. Çend serrî yo ke şarê kurdî seba heqê xo dano pêro, no semed ra tayê heqî nîya amey dest girewtene. Mesela kurdê Tirkîya êndî mesela zereyî ney, meselêda mîyanneteweyî ya. Hukmatê AKP na mesele henî rind fehm nêkeno, coka sîyasetê înkarî û asîmîlasyonî destê xo ra canêverdano. Fikrê înan ê kerdişê kurdkî sey dersa weçînitîye, ma rê nîşan dano ke hukmat mesela kurde rind fehm nêkeno. Kurdkî seba tirk, îngiliz û almanan sey dersa weçînitîye bena. Labelê seba kurdan nêbeno. Ziwanê şarêde 20 mîlyonan gerek mecburî bo.”
