Tirkîya de zêdîyayîşê sîviîan dewam keno. Boykotê mekteban ra tepîya nik kî cêncê Tirkîya nêwazenê ke şêrê eskerîye.

Roja 19.09.2010 de des cêncê kurdî komela ÎHD de amey pêser û vilaweke daye çapemenîye. Des cêncan da zanayene ke ê eskerîye nêşonê û eskerênî wijdanî betal kenê. Serekê ÎHD yê Îstanbul no qerar ser o vat ke “Ta-tayê unîformîyî wazenê ke ma qerarê xo ra bitexelîyê. Eke ma înan ver de çîp nêvindenîme, o taw kûnîme (kewenîme) bin.”

Xortanê ke qerarê xo yê nêşîyayîşê eskerîye da, nê yê: Riza Kartal, Kemal Acar, Metîn Gokduman, Silêman Yilmaz, Bekîr Atiş, Cezmî Kartal, Kerîm Bulut, Mehmet Alî Kaya, Ahmet Hezer û Ahmet Demîrsoy.

Serekê Tevgera Redkerdişê Wijdanî ê Kurdan Demîrsoyî kî qeseyê xo de va ke “Ma bi (ebe) şarê kurdî no herb ra zaf ant (ont). Ma nêwazenîme ke parçeyê nê cengî bibîme. Ma zaf eşkera vanîme ke ma Tirkîya rê xizmetê eskerênîye nêkenîme.”

Nuştox Cezmî Ersozî kî naye ser o henî qisey kerd: “Ordîye nêwazena ke no herb biqedîyo. Înan ra gore ceng dewam bikero, mîlîtarîzm bibo xirt, statîkê xo nîya biseveknê. Aştîye karê înan rê no rî ra nêna. Êndî (êdî) gerek çekî vengê xo bibirnê û şarê kurdî raya xo bi xo tayîn bikero.”

Bi no betalkerdiş heta nika komara Tirkîya de 132 kesî eskerênî qebul nêkerd.