Dêrsim de kombîyayîşo tewr girs ê serranê peyênan seba namzedê xoserî Ferhat Tunçî ame viraştene. Her qezaya Dêrsimî ra pêro pîya 10.000 ra zêde kesî amey pêser û destek da Tunçî.
Mazgêrd ra konvoyê 2.000 erebeyan kot raye. Erebeyî bi renganê kesk, sûr û zerdî amey neqişnayene, ci ra kilamê kirmanckî amey cinitene, keyfê şarî eşkera bî. Dima, konvoyî pêro taxê Mamekîye zîyaret kerdî. Ferhat Tunçî û kesê konveyî verê nêweşxaneyê Mamekîye de amey war û heta Meydanê Seyîd Rizayî ling ra şîy.
Meydanê Seyîd Rizayî de şodir ra şarê Dêrsimî cayê xo girewtîbî û raya Ferhat Tunçî de vindet. Badê ke Tunç kot meydan, mîtîngdaran xeylê deqayî çepikî cenay, sloganî eştî. Kirmancê ke amey meydan, nêverda ke barîkatê polîsanê tirkan înan bivinderno û kot meydan. No sebeb ra polîsî barîkatî dard we û xo ant (ont) peyser. Tunç û dêrsimijan raver ra heykelê Seyîd Rizayî zîyaret kerdo û uca (uza) vîlikî nay ro.
Kombîyayîş de verê wekîlê BDP yê Dêrsimî Şerafettîn Halîsî qisey kerd û vat, “Bedelê ke şarê kurdî da, ney ra nika xoserîya şarî vejîya. Çar serrî ma parlamento de mucadeleyê ney kerd.” Dima embazê (alvozê) Îbrahîm Kaypakkayayî Zîya Ulusoyî da zanayene ke gerek pêro hêzê sosyalîstan dormeyê Ferhat Tunçî de bêrê têlewe û raya xo seba ey bidê. Çepgirê tirkî Levent Tuzelî kî qiseykerdişê xo de vat ke gerek dêrsimijî şerefê xo rê wayîr bivejîyê û têde sosyalîstan ra pîya dest bidê Ferhat Tunçî.
Nê qiseykerdoxan ra tepîya Gultan Kişanakî qisey kerd va, “Hevalê Sey Riza, Bese, Alîşêr, Mazlum Dogan û Îbrahîm Kaypakkayayîyan, şima xeyr amey! Seba ke ez dêrsimij a, pêro kurdî mi ra şaristanê xora daha zêde Dêrsim pers kenê. Ez kî înan ra şona vana ke 10.000 dêrsimijî seba baw û kalikanê xo ewro amey pêser û înan rê wayîr vejînê. Ewro ma veng danîme ke ma zonê (ziwanê) xo ra, îtîqadê xo ra, kulturê xo ra, welatê xo ra cîya nêbîme. Nika dewleta tirke wazena ke Dêrsim bi Kiliçdarogluyî ra ancîya (onca) peyser bicêro. Kiliçdaroglu terseno, nêvano ke “ez kirmanc a, ez elewî ya”. Wa bêro şarê xo de pîya bo. La seba ke o îtîqad, zon (ziwan) û kulturê baw û kalanê xo înkar keno, gerek Dêrsim de ju (yew) ray mecêro.”
Peynîye de Ferhat Tunçî qisey kerd. 10.000 dêrsimijan eleqeyêda girse musnaye vatena Tunçî. Ferhat Tunçî qiseykerdiş xo de va ke serekê partîya CHP Kemal Kiliçdaroglu û sîyasetê xo sexte yo. Va, eke Kiliçdaroglu kot ra sîyaset şî mewzîyê eskerîya Tirkîya, kot musabeqeya Erdoganî ke kam daha pêt o. “Pîrê ma Seyîd Rizayî vatîbî ke hîleyê na dewlete nêqedînê. Eşkera yo ke Kiliçdaroglu kî hîleyêde na dewlet o. Ma duelloyê Kiliçdaroglu û Erdoganî serê zanîyanê xo de, mewzîyê eskerîye de xo vîr ra nêkerd. (…) No şar êndî hîleyanê dewlete rê ray nêdano.”
