Walîyê Bidlîsî Nurettîn Yilmaz Bidlîs sireyo ke şî esnafan ra seba AKP ray biwazo, hetê şarî ra ame hêriş kerdene û xo ju (yew) dikan de xelesna. Wextêde kilm de dormeyê dikanî hetê şarê Bidlîsî ra ame çarnayene. Dima, Yilmaz hetê namzedê xoserî yê BDP ra ame xelesnayene.
Badê ke qeydeyê telefonî ke werteyê wayîrê rojnameyê îslamîstî Yeni Şafak Ahmet Albayrak û walîyê Bidlîsî yê AKP Nurettîn Yilmazî de ameybî neşr kerdene, bîyo eşkera ke Bidlîs de walî û serekê polîsan semedê waştişê rayan seba AKP ra pîya esnafan zîyaret bikerê. Gama ke walî waşt ke dest bi zîyaretê xo bikero, o hetê xeylê kesan ra ame hêriş kerdene. No rî ra walî û mudirê asayîşî xo ju (yew) dikano ke tede çîyê eskerîye roşîno, dard we. Wekîlê BDP ke nêzdî de bî, besekerd ke di saetan ra tepîya walî û mudir dikan ra bivejo.
Protestokeran sloganê jê (sey) “Walî îstîfa”, “Walîyê AKP nêwazenîme” eştî. Badê ke serebût bî girs, wekilê BDP ke şaristanê Bidlîs de bîy, amey uca (uza). Aysel Tugluk, Ozdal Uçer, Nazmî Gur û namzedê Bidlîsî Husamettîn Zenderlîogluyî şarî de qisey kerd, walî û mudir berdî teber. Henî zanîno ke walî no serebût ra tepîya şî ofîsê xo, telefon kerd rojnameyan û medya ra ke na xebere neşr mebo.
