Xebera Zazakî.netî ra gore, mesul û dersdarê unîversîteyanê ke beşê înanê kurdkî esto, şaristanê Wanî de kom bîy ke perwerdeyê berz yê kurdkî munaqeşe bikerê. No kombîyayîş de qerarê muhîmî amey girewtene.
Ame dayene zanayene ke 43 kadroyê akademîkî yê Beşê Ziwan û Edebîyatê kurdkî yê enstîtuyanê ziwananê ganîyan 31. gulane û 1. hezîrane 2014 de seba yew komxebate amey pêser. Na komxebate de hem problemê unîversîteyan hem kî îstîqbalê perwerdeyê berzî yê kurdkî amey munaqeşe kerdene.
Beşdaran peynîya kombîyayîşî de yew vilaweka peynî ya muştereke seba rayapêroyî vila kerde ke cêr ra wanîna:
Vilaweka Peynî
Ma sey beşanê ziwan û edebîyatê kurdkî yê enstîtuyanê ziwananê ganîyan ke nika hewt unîversiteyanê Tirkîya de estê, mabênê 31. gulane û 1. hezirane de problemanê perwerdeyê kurdkî ser o komxebatêke amade kerde. Ma netîceyanê na komxebata xo ya hempare raya pêroyî rê îlan kenê.
- Ma qerar da ke komxebata ma her serre unîversîteyêke de bêro amadekerdiş.
- Komxebate qerar da ke seba caardişê karanê komxebate, endamanê nê unîversîteyan ra komîsyonêk bêro viraştiş.
- Komxebate qerar da ke seba yewkerdişê bername û mufredatê beşan xebate bibo.
- Heme beşdaranê komxebate pêşnîyaz kerd ke serranê 2014 û 2015î de muraceatê akerdişê doktora hetê YÖKî ra bêro qebulkerdiş ke wendekarê masterî bişêyê perwerdeyê xo yê akademîkî bidomnê.
- Komxebate qerar da ke ganî 1500 wendekarê lîsansê berzî yê bêtezî yê ke bi lehçeyanê kurdkî kurmanckî yan zî zazakî wendo û mezûn bîyê, ca de dest bi kar bikîn.
- Hêvîya komxebate a ya ke beşê lisansî yê ziwan û edebîyatê kurdkî bikewîn mîyanê lîsteya beşanê ke formasyon gênê.
- Komxebate waşt ke heme unîversîteyanê mintiqaya ma de beşê ziwan û edebiyatê kurdkî bêrîn akerdiş.
- Komxebate waşt ke fakulteyanê perwerdeyî de beşê mamostayîya kurdkî bêrîn akerdiş û dosyayê ke YÖK de derheqê na babete de yê, berîn qebulkerdiş.
- Komxebate eşkera kerd ke seba şaxê mayzanîstê ziwan û edebîyatê kurmanckî û ziwan û edebîyatê zazakî, ganî komîsyonê mîyanê unîversîteyan kadroyanê doçentî ako.
- Komxebate qerar da ke beşê ziwan û edebîyatê kurdkî, hem têkilîyanê xo û unîversîteyanê Mintiqaya Federal a Kurdîstanî hem zî têkilîyanê xo û heme sazgehanê sivîlan yê bi ziwan û edebîyatê kurdkî ra eleqedar ê, aver bero.
- Komxebate qerar da ke seba îlankerdişê babetanê tezan yê heme beşan, beşî yewbînî de têkîlî ronîn, nameyê tezanê ke qebul bîyê keyepelanê resmîyan yê beşan de îlan bikîn.
- Komxebate qerar da ke heme beşê ma yê kurdkî, dersdayiş û nuştişê tezan de bitaybetî giranîye bidîn her di lehçeyanê kurdkî, kurmanckî û zazakî.
[divider] [/divider]
Unîversîteyê ke beşdarê komxebate bîy û ê qerarê ke vilaweke de yê, girewtî, nê yê:
- Unîversîteya Artûklûyî ya Mêrdînî,
- Unîversîteya Çewlîgî,
- Unîversîteya Alparslanî ya Muşî,
- Unîversîteya Wanî,
- Unîversîteya Sêrtî.
DI/Mehmûd Nêşite/Zazakî.net
