Şaristan û sûkanê welatê ma de seba weçînitene nika meydanî sixlet ê. Partîyî, sîyasetmedarî, namzed û azayî qîrenê, propaganda kenê. Program u wastîşî, nîyet û ajîtasyonî kewtê têmîyan. Seyîd Riza meydanê Dêrsimî de bêveng qayîtê sûk û meydanan keno. Şêx Saîd mezela xo de qayîte domananê xoyê welatperweran keno. Rayan de konvoyê wesayîtan, kolon û kuçan de qîre-qîra partîyan.
Seyîd Riza û Şêx Saîd nê domananê xo de tayîne fam nêkenê û ecêb manenê. Çimê înan ke ginenê sûka Dara Hênî, yew park de nameyê yew gonîwer û înkarkerê tirkî ke nameyê xo Muhsin Yazicioglu yo vînenê. Kamî ke naye kerdo, ci ra lenet kenê. La, êyê ke naye rê bêveng manenê, înan rê kî ecêb manenê.
Bira, şima Fîlîstîn de nameyê yew gonîwerê Îsraîlî nêvînenê. La Dara Hênî de nameyê yew “îsraîlijê ma” vînenê. Meydanê Meletî de, Xarpêt de, Erzingan de, Erzurum de “îsraîlijê ma” zê hêgayê pîyê xo propaganda kenê, qîrenê. Vengî ebe tirkî sûkanê welatê ma de vila benê.
Şono ra zorê mi! Gineno gonîya mi ra! Vengê to, vengê ma şenik o, bira. Çike ebe zonê ma ti propagandayê xo nêkena. Tirk vano “demokrasî”, ti vana edalet! Ebe tirkî, çiqas qalê demokrasî û edaletî kena wa bike, nîjadperest û teresê tirkan rê derd nîyo. Ti qey meydananê welatê ma de ebe zonê xo nêqîrena, propaganda nêkena?
Ezo budela! Nika îta de reyna vana, şima naye xo vîr ra mekerê: Çi wazena, derdê to çik o, ebe zonê xo vaje. Eke henî mebo, kayê asîmîlasyonê tirkan dewam keno. Asîmîlasyon ke dewam bikero, xora veng û rengê to, kamîya to binê bandura tirkan de maneno.
Namzedê BDP, namzedê welatperwerî, şima ra vana: Meydananê welatê ma de ebe zonê ma qisey bikerê, biqîrê. No karê şimayo zaf muhimî yo. Weçînitişî vêrenê, nazmed û azayî yenê weçînitene, xem mekerê, şima ra tayê kunê parlamentoyê tirkan, nê rojan ma zaf vînit, derbaz benê, la zonê ma, kamîya ma “derbaz nêbenê”.
Şima wekîl ê, wekîlê nê zonî û na kamîye yê. Eke no rast o, eke şima wekîlê nê şarî yê, gerek zonê nê şarî bizanê, qisey bikerê. No firsend mekerê qedayê hesebanê qijkekan. Meydanan de vengê zonê ma biwesênê. Demokrasîya ke her firsend de qal kenê, serê kamîye û rastîya ma de virazîna. Bibê vengê na rastîye, la veng ebe zon o. Kamîye û rastîya her şarî ebe zonê ê şarî beno. Ebe zonê almankî demokrasîya fransizan nêbena, ebe zonê tirkî demokrasî û serbestîya ma tewr nêbena.
Ma mirenîme, zon, welat û şarê ma maneno, hama zon ke bimiro, her çîyê ma mireno. Welat ebe zonê ma beno rind. Meydan ebe zonê ma xo xemilneno. Rew-herey, dewleta tirke biwazo, mewazo, na persa ma ya neteweyî çareser bena. La, dewleta tirke wazena ke tepîya bierco, na raye seba xo derg bikero. Ma gerek na raye kilm bikîme. Na dinya de şaro ke zê mesela ma, yanî ebe serbestîya zon û kamîya xo ra halîno, çin o. Nimûneyê ma na dinya de çin o. Xemê dinya nîya ke ma hîna ebe zonê xo perwerde nêşikînîme bikîme. Welatê mi de mektebî ebe zonê ma çin ê. Ez ebe zonê xo welatê xo de perwerde nêbena. Memur, amîr, malim, mudur ê tirkan ê welatê mi de. Qederê ma hîna nê tirkî goreyê waştena xo îdare kenê. Welate ma de ma ney, tirk ma îdare keno. Her çî ebe destûrê înan beno.
Nimûneyêde nîyanên na dinya de çin o.
No hal şono ra zorê mi, gineno gonîya mi ra. Serê mezelanê meyîtanê ma ra ma hîna ebe destûrê tirkan gerek binusîme. Ma nêşikînîme nameyê meyîtanê xo serê kemera mezela înan ra binusîme. Derdê ma giran o, vengê ma şenik o. Meydanan de ebe zonê xo biqîre bira! Çi wazena, ebe zonê xo vaje.
Mordem gerek xo weçîno ver de. Ma birinc wenêçînenîme, zon û kamîya xo, serbestîya xo, qederê xo weçînenîme. Ez rind zanena ke qederê ma, meclîs û parlamtoyê tirkan de wenêçînîno, o ke şima wazenê şorê meclîsê tirkan, qet ke nêbî ebe temsîlkarîya zon û kamîya ma şorê. O ke şima vanê “îlam ke meclîsê tirkan de ma persa xo çareser kenîme”, o ke şima welatê ma de, meydanan de şarê ma ra vanê “ma temsîlkarê şima yîme”, de tawa nêbeno, hama ebe zonê nê şarî qisey bikerê. Naye ra dot ez canweşîye şima rê wazena.
Îlhamî Sertkaya
Kek Îlhamî to babeta parka Darahênî ser o nuşto û ez zî qayila ke na mesele ser o çend çîyan vaje..No serekê şaredarê yê Darahênî vera cû çende rey seba ke bibo serek, partîyanê cîya cîyayan ra namzet bi..înan ra yew zî partîyê faşistanê tirkan bi nameyê “BBP” bîy..labelê sernêkewt..Bade cû AKP ra namzet bi û bi serek..No merdim nameyê ey Abdurrahîm Arîç o..Bi eslê xo dewa modan ra yo û çi heyf ke merdimê “Feqî Hesen” î yo..Feqî Hesen yew qehremanê kirdan o û serewedartişê Şêx Seîdî de Walîyê Darahênî bîyo..Gama ke serewedartiş sernêkewt..Ey û hevalanê xo pîya Diyarbêkîr de meydana berê koyî de darda bîyê..No merdim Feqî Hesen û Şêx Seîdî ra zî nêşermayeno..Wexta ke no nameyê goniwerê tirkan yew parkî ra pana..Çende rey xortanê welatperweran, şewe tabelayê parkî bi boyax hona kerdîy labelê no merdimî bêesil zî seke eks bikero reyna roje, nuşteyê tabela zedeyêr beraqna..Merdimêko bêesil o, tim û tim bi serleşkerê tirkan û polîsan reyde ronişeno..Hetê ma de yew vateya verênan esta vanê “Şino gîyê xo cayê cenderman de keno”..No merdimî zî no tewr yew merdim o, şarê xo ra şermayeno..Xo tirk hesebneno, polîs û eskeran reyde roniştiş çîyêko pîl hesebneno..Dara hênî de çew no merdimî ra hesnêkeno, çi heyfa ke AKP ra heskenê û na semed ra rey da no bêesilî û AKP zî no merdimî teres ard û kerd bêlayê serê eynan..Eke rojêk ma dawayê xo de serkewte, ey wext no merdimî bêesil eke hewtay serre bo zî ez zana ke xortanê ma do heme şêrê û tif bikerê rîyê no bênamûsî…Ez se vaje..De ti bimanê xêr…
Bira Cemîl
Kam se vano, vajo, ma de hîsê netewayîye şenik o. Eke henî nêbîyêne, o mordem o park de, ê nameyê nêşikî yêne binusnê. Dara Henî de helîna kolonyalîstan aşîra Zikte ra vejînê. Na aşîre, Çewlig de, destekê kolonyalîstê Tirkan a Pî rika Kazin Ataoğlu, waxtê Şêxsaîdî de Karêrijan şevekna, nêda destê dişmenan. Na aşîre rusîyayê Çevligî ya. Tirk Çewlig de, saya na aşire ra bandura xo rameno.
Hîsê netewayîtîye, hîsê heysîyetî yo. No hîs ke yew mordemî de çînîbo, heysîyat nêmaneno. Vizêrî MHP saya nînan de Çewlig de bî, o ke pere nêkerd, nika AKP saya nînan de Çewlig der o.
Na aşîrete Tirkan ard Çewlig. O bîn, muhim nîyo. Mesela, partî-martî nîya. Mesela, hîsê netewayîtîye wa. Yew fahîşeya Uruzî, Almanî, Fransizî , seba kamîya milletê xo, bê lam-cim sare berzkena, reaksîyon nîşan dana. Heysîyat u hîsê netewayîtîye nîya yo birayê mi.
Ez Dara Hênî rind zanena. Na aşîre ebe eskeran u jiteman, zaf qehremanan werd. Sidik Bilgin ra bige, hata Hişyar Agaoglu…
Nika nameyê Muhlis Yazıcıoglu o park de dardekerde wo. Şono ra zorê mi. Çi bizanî? Waxtê ma de çîyêde nîyanên nêbîyêne. Ma ra hîsê netewayîtîyedê xurte lazim o, yew bîn, aqilê mi zaf ‘teorîyan u analîzan nêgêno’!.
Seba eleqedarê to, weşîye u serkewtene wazena to ra.