Şarê urisan serranê peyênan de paytexê Îngilîstanî Londra de xeylê ban (bon) û dayîreyê bahayî herînay. Goreyê fîrmaya mişewreyî Knight Frankî ra para urisan herînayîşê bananê ke panc (ponc) mîlyon Paund ra zêde yê, 14 % a. Na hûmare ra gore her rotiş ra hewtê şono urisê dest.
Urisî bitaybetî banan ke fîyatê înan 5 mîlyonî Paund ra berz o, cênê. Semedê fîyatnizmîya banan û yê Paundî ra no çax urisî taxanê Londra de emlakan saye kenê. Urisan ra qederî kî şarê dugelan Londra da xeylê ban û dayîreyan herînenê. Para înan ê bananê luksan ke 5 mîlyon Paund ra zêde yê, 68 % a. Werteyê înan de 14 % uris, 11% amerîkayij, 9% îtalyan û 8% hîndî estê. Ê taxanê Londra Mayfair, Knightsbridge û Hampstead de banan herînenê.
Seba ke herînayîşê banan hende zêdîyayo, fîyatî Londra de 12 aşmeyan de bi 20% bîy berzî. Na fîyatberzîye ra tepîya nika fîyatê banan tikêna, bi 6% kêmî yê. Na hûmare kî kena eşkera ke fîyatê banan no taw zaf$ baha yê. Labelê şarê dugelan hîna girewtişê xo dewam keno, çike erjaya Paundî nika zaf nizm a. Pisporê emlakan ra gore heta nika semedê erjanîya banan xeylê hemwelatîyanê dugelan paytext de banî herînay, feqet emser êndî fîyatê banan henî erjan nîyo. Seke Paund hîna nizm o, emser kî Londra de zaf dayîre û banî yenê herînayene.
Semedê erjaya nizm a Paundî kî sermayegozarîyê dugelan o. Para Çinî ya Paundî girs a, adare 2008 ra gore 31% ra zêde hêzê herînayîşê xo yê Paundî esto. Sey (jê) çînijan bi (ebe) pereyê Hongkongî, DYA, Erebîstanê Seûdî, Sîngapûr û Malazya 28% yê Paundî pêcênê. Şarê Londra hetê ra şaş beno û heto bîn ra kî qahirîno ke seba şaranê dugelan fîyatê banan nîya sey serranê verênan ê 2008 ê. Çike xeylê îngilizî rîyê deyn û kredî ra mecbur bîy ke bananê xo erjan biroşê.
