Tirkîya û Kurdîstanê Vakurî de weçînitişê serekkomarê Tirkîya

Vizêr Tirkîya de weçînitişê serekkomarîye ra serekwezîrê Tirkîya yê AKP Recep Tayyîp Erdogan sey netîce bî serekkomaro 12. yê Komara Tirkîya. Namzedo kurd ê HDP Selahettîn Demîrtaşî % 9,8 yê reyan girewt.

Goreyê netîceyanê neresmîyan ra, pêro pîya Erdogan % 51,8 (20.999.787 rayî) yê rayan girewt. Namzedê partîya kemalîste CHP û partîya neteweperesta tirkan MHP Ekmeleddîn Mehmet Îhsanogluyî % 38,4 (15.586.145 rayî) yê rayan girewt. Namzedê HDP ê kurdî Selahettîn Demîrtaşî kî bi % 9,8 (3.958.074 rayî) yê rayan, cayo hîrêyin de mend. Nîya Erdogan beno serekkomarê Tirkîya yo 12. Nêzdîyê 56 mîlyonî weçînitoxan ra 40 mîlyonî şîy sindoqan ser.

Dêrsim de Demîrtaş serfiraz vejîya

Kurdîstanê Vakurî de zafêrî Demîrtaş ame weçînitene. Dêrsim de kî bi % 52,2 yê rayan (21.746 rayî) Demîrtaş verên ame. Cayo dîyin de Îhsanoglu bi % 33,4 (13.897 rayî) û dima Erdogan bi % 14,4 (5.979 rayî) esto.

Netîceyê qezayanê Dêrsimî nîya r’ o (seba girskerdiş bitiknê):

Demîrtaş: Ma reştîme hedefê xo

Namzedê HDP Selahettîn Dermîtaşî Dîyarbekir de yew konferansê çapemenîye de qisey kerd. Vilaweka xo de Demîrtaşî da zanayene ke o hêvîdar o ke netîceyê weçînitişî bixeyr bibê. “Bi nê weçînitişî ra ma gama destpêkêda newîye daye. (…) Ma musna ke ha kurd ha tirk ha armenî ha laz ha ereb ha çerkez bo, ha elewî ha sunî ha êzîdî ha yahûdî bo, pêro nasname û bawerîyan ra pîya ma kedaya aştî, demokrasî û azadî daye.”

Derheqê netîceyê weçînitişî de Demîrtaş va ke “Ma bi nîsbetê xo hema-hema reştîme hedefê xo. Labelê ez wazena bala xo bidê nê xusûsî: sindoqî verê zaf leze amey rakerdene. 45 deqayan de dorê % 98 rabîbîy. Ê % 2 ke mendî, çi estbî ke ranêbîbîy. Ma netîceyî nêgirewtî. Keyepelê resmî yê YSK ser o nîsbetê ma yê reyan hîna % 9,7 bî. Sindoqê dorê % 10 hîna ranêbîy û netîceyî kî neşr nêbîy. (…) Ma sebebê na rewşe cêrenîme. Xeylê cayan ra îddîayê hîle û qusurî yenê. Her ca ra ma rê gerreyî yenê.”