Kovara ekonomî û sîyasetî yê Amerîka The Economist na hûmara xoya aktuele de meselaya kurdan û Tirkîya analîze kerde. “F-16 yê Tirkîya asmên de çerexînê, erebeyê ekîbanê eskerîya Tirkîya binê awiranê baldaran ê çekdaran. Sîya (şîya) cengî ancîya (onca) ameye serê başûrê rojhelatê kurdan ê Tirkîya.”
The Economist nuşt ke teyarayanê F-16 yê Tirkiya ancîya koyan de cayê PKK bombarduman kerdî û tayê gerîllayî kiştî. No semed ra herbê werteyê Tirkîya û PKK ke 25 serran ra dewam keno, reyna çi fayde nêkerd. 22. hezîrane de Îstanbul de yew (ju) suîkasto bibomba yê TKA de çar eskerî û yew çêneke (kêneke) amey kiştene. Endamê Weqfa Aştîya Mîyanneteweyî yê Carnegîe Henrî Barkey ano ziwan (zon) ke, “Na reya vêren a ke PKK no ceng rojhelat ra ano rojawanê Tirkîya.”
The Economist qeseyê Erdogan û BDPî muqayese keno. Erdoganî ra gore xirabinkerdena raya aştî û demokrasîye rîyê PKK ra yo. Labelê PKK û BDP kî vanê ke qeseyê Erdoganî xelet ê. Nîsana 2009 de çekdaranê kurdan adir birnaybî û waşt ke na mesela bi (ebe) dîyalog hal bikerê, hama ordîya tirke operasyonê xo nêvindernay. Serekê BDPî yê şaristanê Dîyarbekirî vano ke, “Ma her roje meyîtê gerîllayan darîme we. Yew serr a ke 1.500 sîyasetvanê kurdî amey hepiskerdene, serekê beledîya kî teder ê. No îspat o ke no rakerdiş sirf zur a.”
The Economist vengê kurdan nîya nîşan dano: “Kurdî heqê qijkekî wazenê, xoserîye û dewleta Kurdîstanî nêwazenê. Ê wazenê ke na mesela ser o Tirkîya bi PKK û Ocalanî ra qisey bikero.”
Goreyê naye heqanê ke kurdî wazenê, nê yê:
– Vurnayîşê qanûnê bingeyî, bitaybetî o yo ke Tirkîya de tirkan ra teber kî şarî estê
– Îdareyo federal
– Perwerdeyê ziwanê kurdkî mektebî û unîversîteyan de
Xeylê wendoxanê tirkan The Economist na xebere bi zure û propaganda şîrove kerde.
