Xeylê wext o ke fîyatê zerrnî vejîno. No taw erja onsêde zerrnî serê 1.475 Dollarî der a. La sermayegozarî hîna raverşîyayîşê zerrnî ser o hemfikr nîyê: tayê vanê zerrn yeno war, tayê kî vanê ke hîna 2.000 Dollarî ser o vejîno.
Sermayegozar û managero namdaro amerîkayij George Sorosî emser depoyê xo ra zerrn kerd kerd teber, nêzdîyê 800 mîlyonî Dollarî ra û zerrn rotî. Enformasyonê Dezgehê Kontrolkerdişê Borsa yê DYA (SEC) ra gore tayê sermayegozaranê bînan emser xeylê zerrnî rotê. Înan ra Paul Touradjî hedge fonê xo SPDR Gold Share ra 25 mîlyonî Dollarî rotî.
Optîmîstê zerrnî John Paulson nêwazeno ke sîkavê xo yê zerrnî ra cîya bo. O hîna 4,4 mîlyarî Dollarî zerrn depoyê xo de vindarneno. Sermayegozaro bîno meşhur Jîm Rogersî ra gore fîyatê zerrn no taw berz maneno. Beno ke zereyê di serran de fîyatî ginenê war o. Gerek merdim (mordem) no şanş bixebitno û zerrn biherîno. Ey ra gore kî heta serra 2020 erja zerrnî resena 2.000 Dollarî.
Fîyatê zerrnî werteyê hîrê serran de bî di qatî û heta 1.575 Dollarî vejîya. Badê ke tayê sermayegozarê girsan depoyê xo yê zerrnî kerdîbî tal (tol), erja zerrnî ginaye 1.475 ro.
- Hîrê aşmanê peyênan de erja onsêde zerrnî (bi Dollar).
