Sîyaset ke nêbîyêne, dinya bîyêne rindeke

Heya, ez o ke emrê xo sîyaset ra vîyarno, naye vana. Sîyaset mordemî keno binê tesîrê xo, xeletîya xo, şaşîya xo, mixenetîya xo, zurekerîya xo, keno adet, keno aqil û ruhê mordemî. O waxt endî seba nê mordeman her çî sîyaset û partîya nînan a. Partî û serekî êndî seba nînan beno tabu û teberik.

Na xirabîye henî xorî ya ke mordem naye nêzano, çi ke nêzanitişê xo nêzano. Coka sîyaset zafêrî mordemî keno fanatîk û murîd. Ecêbîye na ya ke însanî seba ke muridîye red bikerê-kerde, kewtê sîyaset. Însanî, seba ke axa û paşayan, beg û begleran, neheqîya înan nêwaşte, nêwazenê, benê hetkarê sîyasetî, la îta de benê hetkarê axa û paşayê sîyasetî.

Ha axayê dewe, ha paşayê partîye, çi ferqê xo esto? Ha mîrê murîdan, ha mîrê sîyaset û partîye, çi ferqê xo esto?

Ha axayê dewe, ha paşayê partîye, çi ferqê xo esto?

Her het ra zî însanî qederê xo teslîmê yew kesî kenê. Ti ke nîya ya, ha xo ra vaje sosyalîst, marksîst, dîndar, lîberal, roşnvîr, wendekar, modern… çi ferk keno? Pêxamberê dînan tenya ney, çi heyf ke pêxamberê sîyasetî peyda kenê. Oxro ke mordem seba ke qederê xo, qederê şarê xo nê tabu û pêxamberan ra raxelesnê, kewtê sîyaset. Na nakokîye û ecêbîya însanî ya. La çi heyf o ke verba nê sîyasetê xirabî, çare ancîna sîyaset o.

Şima ecêbîye vînenê?

Gelo qey ziwanê ma yo perîşan de yew roman, yew meqale, yew eser, qasê nuşteyê sîyasetî nêwanînê? Sîyaset zafê reya beno astengê rastîya şarê to, beno astengê to. Çike to rastîya xo terikna, rastîya xo ra dûrî kewta, sîyaset êndî to rê bîyo hobî.

Nê hobî êndî rastîya to û ti kerda lobî. Lobî ya ke ez îta de qal kena, manaya çekuya tirkî nîya, noa lobî werîna. Şima lobîyan nêwenê? Şima wenê, la nêzanenê.

Gelo însan mecbur o ke bibo murîd? Însan mecbur o ke cor de kamî çi va, ey rast bivîno, bikero? Memurê rastîye kam o? Rastîye çik a?

Seba ke ez serekê partîye nîya, vateyê mi rast nîyo?

Nika ez vana “ziwan ke biqedîyo, o şar zî qedîno”, na rast nîya? Seba ke şima naye fam bikerê, wayîrê nê vateyî, yanî ez, gerek bibîyêne serekê yew partîye? Seba ke ez serekê partîye nîya, no vateyê mi rast nîyo? Seba ke ez serekê yew partîye nîya, şima gerek kitabê mi mewanê? Serekê şima ke ziwanê ma nêzano, gelo no seba şima normal o?

Sîyaset zaf çîyêde ecêb o. Na ecêbîye zafê reya hetkaran kena tar û mar. Ne bibê tar ne zî bibê mar.

De ez çi vajî zî, fayde nêkeno, çike ez serek nîya. Mal, milk, serek, sandalî, rutbe, mewkî, xapnayîş, menfaat yê şima bo, romanê mi yê ke “sayeya biaqilan de” sêwî mendê û manenê, yê mi bo, bes o.

Romanê mi yo peyên ke mi nuşto, qedêno, dosyaya mi de henî vileçewt vinete yo, bê îmkanîye ra hîna çap nêbîyo, nêweşîya yo, xemê kamî yo ke? Xemê kamî yo ke ez nîya nusena, vana, qîrena? Xemê sîyasetî yo? Xemê sîyasetmederan o? Şima rê eyb o, eyb!

Gulê memire, wisar yeno. Ya ti bi xo wisarê xo peyda kena, ana ya zî wisar nêno, Gulê! Ne xo bixapne, ne zî sîyaset to mexapno. Ez bi nê derdî, ez bi na bêeleqedarîya ziwanê ma, mirena, Gulê!

Wa bo! No derd derdêde rind o.