Nêzdîyê yew hewte yo ke şaristanê Kurdîstanî Cizîre dinya ra birîya ra. Heyetê HDP ke vizêr kewtbî raye, înan ra yew grûba sîvîlan nika reşt Cizîre.
Bi hezaran kesê ke vizêr şodir kewtbî raya Cizîre, ewro resayî şaristano ke tede vizêr tewr tay heşt kesî ameyî kiştene. Çi esto ke hêzanê asayîşî ceribna ke beşdarê nûmayîşî bi gaz bivindarno. Melumatê eskeran ra gore “cor ra telîmat ameyo” ke vîyartiş mumkîn nîyo. Ancîya, parlamenterê HDP Ertugrul Kurkçuyî ra gore muzakereyî dewam benê. HDP qerar dayo ke qetî şêrê bi Cizîre.
Heta o taw heyetê HDP Hezex de vindeno heta ke destûrê şîyayîşî vejîyo. Demîrtaşî no derheq de va “Çi ke uca beno wa bibo, wa rakerê ma pîya nîyadîme. Ma nika cêrenîme ra Hezex, la no ragêrayîş nîyo. Ma Hezex de merkezê krîzî seba Cizîre nanîme ro.”
Se bîyo?
Heşt rojî yo ke dewleta tirke Cizîre de halo îstînayî na ro. Şarî besenêkeno bananê xo ra vejîyo teber, eskerî her keso ke kuçeyan der o kişenê. Şarê Cizîre bê awe û bê nan mendî, rîyê qedexeyî ra meyîtê sîvîlan kî nênê wedardene.
Coka, seba ke qetlîamê dewleta tirke bivindarnîyo, vizêr şodir heyetê HDP waşt şêro Cizîre. La hêzanê asayîşî yê dewleta tirke nêverda ke konvoyê heyetî dewam şêro. Munaqeşanê dergan ra dime heyetî abluka vîyarna û qerar da ke pay ra dewam bikero. Bi hezaran sîvîlî beşdarê şîyayîşê înan ê 130 km bîyî. Heyetî mîyan de hemserekê HDP Selahattîn Demîrtaş, parlamenter Osman Baydemîr, wekîlî Alî Haydar Konca û Muslum Dogan, pêro pîya 40 parlamenterê HDP û bi hezaran hemwelatîyî estê.
Demîrtaşî destpêkê nûmayîşî de vatbî: “Heta ke rişîyayîşê gonî nêvindeno, ma xoverrodayîşê xo ra dewam kenîme. Nameyê aştî û biratîye de ma ver bi Cizîre şonîme. Kes besenêkeno vernî ro ma bigîro.” Eynî esna de hetê parlamenteranê AKP û MHP ra ame waştene ke masunîyetê Demîrtaşî yo teşrîî bêro wedardene. Dozgerîya Tirkîya derheqê ey de wazeno dewa rakero. Seba naye gerek parlamento kom bibo, la heta ewro parlamento hîna tatîl der o.
