Qesîde III
Awka Zagê
to Dêrsim dîyo
ê koyî û ê çimeyî
Awa Zagê
cayo ke Elî Heyderê ma bi gird
biewnî
nê koyan ra, no kerreyo sipî çend berz o
a kîşte û na kîşte de
mîyan de zî Awa Xarçikî
çend weş a, çend delal a
û şina, winî bêveng, bêçare bermena ke
verê xo dayo Heqî û Heyderan
halînê Xidê Elê Îsmî, babê Ap Hesenî
û kalê Elî Heyderê ma
a roje
a roje ke Seyîd Riza kewt raya Erzinganî
laser werişt bira û û pêroyê milçikan xo nimit
tirkan ra
binê nê daran û qulê koyan de
bê to û bê Xizir Bavayî, bê domanan
bê cinîyanê ke Kerreyê Laçî ra xo eşt Munzurî mîyan
kam mendîbî delalê, nê koyan û newalan de
qey nêno to vîrî
o wexto ke adir perra zerrîya Pirdê Mutî
wax, wax û hewar
delalê
û delala çimrengîne eşqa girde
tîja mi
veng
veng bide embazê ma
embazê Heqî
Bûyêr Bava
de rew bêrê
û veng bide milê Hengirwanî
Rosnekî, Dereyê Qutî
biewnî, veng û varit mendî heme koyî
heme newalî û Dêrsim
wexto ke tirkan Seyîd Riza berd Xarpêt
erê
“e
e bira
ti qet mezane
wa bizano şar
nê ganî, nê erdişsipî çî dî û çî nêdî
e bira, ez apê to Hesen o
no Dêrsim o, ka Balikesir û Savaştepe
tew, tew, tew
tew lo bira”
_________
Çime: Kişanak, Zulkuf, Delala Çimrengîne rê Qesîdeyî, r. 25-28, Weşanxaneyê Vateyî, Îstanbul 2007
