Serrgêra Qetlîamê Mereşî

32 serran ra ver, roja 19. kanûne 1978 de dewanê kurdanê elewîyan ê Mereşî de ju (yew) qetlîamo plankerde ame viraştene. No hêrişo gonin heta 24. kanûne dewam kerd û peynîye de jê (sey) “Qetlîamê Mereşî” kot tarîx.

Sereyê hêrişî de ju (yew) bomba ameye eştene bi ju (yew) sînema, dima no sebeb ra hêrişê kurdanê elewîyan bî. Çîyo ke o wext nêameybî zanayene o bî ke na bomba hetê merdimê (mordemê) ke hetkarê qetlîamî bîy, ameye eştene. Eştoxê bomba, Okkes Kenger, tepîya bîyo parlamenter. Serebûtê a bomba ser o hetê rastgir û hêrişkaran ra sloganê jê (sey) “Heta peynîye gonîya mi Îslam o” ya kî “Tirkîya yê musluman a” amey vatene, şarê Mereşî kot tê. Hêriş de xeylê banî (bonî) û dikan amey veşnayene, bombayî amey eştene. Naye de kî ju (yew) pîrê elewîyan dinyaya xo vurnaye.

Roja 21. kanûne de kî malimêde çepgir hetê hêrişkaran ra bi çekan ame kiştene. Wexto ke cenazaya malimî bîbî, xebera ke guya komunîstan hêrişê camîyê kerd, reşt goşê miletî. Na xebere ser o hêrişê çê (keye) û mal û milkê elewîyan dest kerd ci. Taxanê ke tede kurdanê elewîyan ciwîyayêne, hîrê rojî binê hêriş de mendî. Banî (bonî) veşay, hêrişkaran eşt milet ser, çi pîl çi qij, çi cinî çi camêrd, çi diganî çi doman, peynîya peynîye de dorê 500 kurdê elewîyî amey kiştene.

Ame dîyene ke ne polîs ne kî eskerî mudahaleyê hêrişkaran kerd. Jê (sey) netîce kînê şarî dewam kerd û kurdan elewîyan hardê (erdê) xo terk kerd şîy. Heta ewro planviraştox û tehrîkkarê nê qetlîamî tam nênê zanayene.