Serra newîye rê merheba!

Bi hîsanê serra newîye merheba gelê kirmancan, gelê qomê ma, gelê embazan, gelê nas û dostan, way û birayan, şima pêrune rê rêyna merheba!

Merheba serra newîye, merheba! Ti bi xeyr ama û bi xeyr kî şo!

Heya, rind-xirab ju serrade bîne bi teqer û tuqer, bi teq û req, bi hey lêmin û wey lêmin, bi ax û wax ame û çimanê ma ver ra derbaz bîye û şîye. Heya, derbaz bîye û şîye, la se? Tayêne rê rind, tayêne rê kî xirab ameye. Merdim ke rindîye û xirabîye eştê têver, bawer bike ke xirabîye emser reyna hukm kerd. Tayêne bi keyf û eşq dem û dewran ramit, tayêne kî binê top û tifengan de şîn û şîwan kerd. Merdim ke zereyê yew sîstemê nêweş û xerepîyayeyî de bî, ya şîn keno ya kî şîwan keno.

Serra 2016 de rojî bîyê ke ma zaf kewtîme xo ver, berbayîme, dejayîme, ginayîme war ro, izdirab ont… la raştî kî ma serra 2016 ra honde zerrîweş û keyfweş nîyîme. La oncîya kî heyat dewam keno. Mordem gere oncîya kî bêomid nêbo. Verba nêheqîye de, verba zulm û zordarîye de mucadele bikero. Ma gere naye rind bizanîme, dişmen xayîn o, bêbext o, bênamûs o, bêşeref o… verba nê xayînan de kî vengê xo, mucadeleya xo berz kerîme û verba nê bêbext û xayînan de doş biderîme doş û êdî ju bîme, ju bîme, ju bîme… Qasê jubîyena ma qet çîyêde muhîm çin o.

Ju bîme, ju bîme, ju bîme

Qayîtê ci be, ma serra newîye de hona çimê xo yanêkerdbî ke Îstanbul ra xebera sîyaye ameye û xeylê însanê masûmî, însanê bêsuc û bêgunayî hetê terorîstanê DAÎŞ ra ameyî kîştene. Destpêkerdena serra 2017 ke nîya bo, gelo peynîya xo se bena?

Ewro naye her kes rind zano ke rewşa Tirkîya qet rinde nîya. Roje bi roje verba xirabe şona. Dewleta ke wekîlan, roşnvîran, rojnamegeran, akademîsyena bierzo nezaretxane, ti a dewlete ra êdî çi pîmena? Dewleta ke terorê terorîstanê DAÎŞ rê bêveng vindo, terorê DAÎŞ ra zewq û keyf bicêro û terorîstanê DAÎŞ rê çimanê xo kîp kero, helbet terorîstê DAÎŞ kî nînan ra qewete cênê, piştîye cênê û însananê masûman kîşenê.

Zîhnîyeto ke dişmenê însanan bo, ê zîhnîyetî ra xeyr neno. Ewro qedr û qîymetê însanan nêzanitene de, heqê merdiman nêdayene de, însanan têduşt de nêguretene de, heq, huqûq, edelet binê linganê xo guretene de, însanan rê zulm û îşkence kerdene de, asîmîle û înkar kerdene de… bawer bike ke dewlata Tirkîya ser o yew dewletêda bîne çin a. Yanî na nêheqîyênî ser o ke ewro dewletan mîyan de yew statîstîk ke biameyêne viraştene, Tirkîya rêza yewine de bêguman cayê xo guretbî.

Zulm û zordarîye, feqirîye û hêsîrîye bîyê zêde, kêmî nêbîyê. Mabênê feqir û dewlemendan de qasê koyan firqe esta. Bi kilmek Tirkîya de feqirîye, belengazîye, bêkesîye, bindestîye, îmha û înkarkerdene sereyê xo gureto şona. La kanta û kamcîn hetî ser şona, ma nêzanîme. Êdî Xizir ra bi xeyr ê.