Wendoxê hêcayî!
No mesajê min ê serra newî yo ke wazena şima rê biwesênî. Dinya, welatê ma, şarê ma endî serra 2014î vîyarnenê, dest kenê serra 2015î. Çi heyf ke şarê ma zê zafêrî şaran û welatanê bînan bi şabîyene na serre zî nêvîyarna. Îslamîstanê fanatîk û gonîweran (DÎÎŞ) ebe xederîya xo hêrişê şarê ma kerd, zaf cayan de şarê ma qir kerd, gonî rişna, dew û şehrî wêran û talan kerd. Kurdîstanê Başûrî de pêşmergeyê qehremanî ver bi nê xeder û zaliman bi qehremanîye herb kerd. Goreyê zanyaran heta nika mabênê çar aşman de 727 pêşmergeyî bîyî şehid, 3564 kesî zî bîyî dirbetin. Pêşmergeyî piştî daye cengewarê Kobanê, no şehr fanatîkan de seveknayî, xelas kerd. Pêşmergeyî ebe cengawerê Kobanê qewetê xo kerdî têser, bi qehremanîye ver bi dişmenanê Kurdîstanî de herb kerd. No seba yewbîyena qewetê Kurdîstanî zaf weş û muhîm bî. Hesreta şarê ma yê yewbîyene ra moralê şarê ma tayê berz kerd.
Dewleta tirkan û kemalîstan, herçiqas ke planê qilêrî şarê ma ser o viraştî zî, besekar nêbîye, nê planê qilêrî gewrîya înan de mend. Dewleta tirke yew het ra bi nimite piştî da nê fanatîkan, yew het ra “merhale sureç” ramit. Erdoaganî bawer kerd ke nê îslamîstê fanatîkî Kobanê danê war ra, kenê binê destê xo. Coka ke bi keyf va ke “Kobanê ewro-meşte keweno destê DÎÎŞ”. La no keyf pirnika Erdoganî ra ameya.
Serra 2014 Kurdîstanê Vakurî bi giranîye reyna ebe planê “merhaleyî” vîyarna. Qet çîyê nêvurîya. Peymanê Hewlêrî yo ke seba yewbîyena şarê ma yê vakur û rojawanî, helbet seba pêro Kurdîstanî bixeyr û muhîm bî, çiqas ke tayê destê qilêrî verî wastî ke bixemitnê, dime ra axir reyna bî candar. Saya nê peymanî de ewro ver bi dişmenan yewbîyena vakur û rojawanî gamê rindî ercîyê. Dewleta Amerîka û Ewropa piştî daye hukmatê Kurdîstanê Vakurî ke no zaf muhîm bî. Ma reyna şahîd bîme ke eke ma yewbîyena xo nêvirazîme, piştî medîme yewîne, kes ma rê nêbeno yar. Ma bêçare manenîme, vila benîme dîyar bi dîyar.
[pull_quote_left]Eke ma yewbîyena xo nêvirazîme, piştî medîme yewîne, kes ma rê nêbeno yar. Ma bêçare manenîme, vila benîme dîyar bi dîyar.[/pull_quote_left]
Axir nê belayê fanatîkanê DÎÎŞî Kurdîstanê Başûr û Rojawanî de xeylê def bî, pêşmergeyê qehremanî Şengal raxelesna. Na mizgîne serek Mesûd Barzanî bi xo da. Serdarê nê operasyonê girsî zî Mesûd Barzanî bi xo bî.
Yew het ra qirkerdişê şarê ma, yew het ra serkewtişê cengawerê Kurdîstanî. Hem xem hem şabîyene. Ma binê nê hîsanê serûbinan de serra 2014 vîyarnaye.
Wendoxê hêcayî!
Qet yew kes, partî yan îdeolojî welatê ma Kurdîstanî ra zêde muhîm nîyo. Kurdîstanî mekîme qedayê şexsan, partîyan, îdeolojîyan; şexsî, partîyî, îdeolojîyî rojê ney rojê waxtê xo mirenê, la Kurdîstan maneno. Ebe nê fikr û mantiqê welatperwerîye, seba dewletbîyena Kurdîstanî, seba netewîya azadîye û demokrasîye, bibîme wayîrê toleransî, bixebetîme. No ma pêrune rê lazim o. Veng û rengê ma çi beno-bibo, bê Kurdîstano azad û demokrat, çareyê ma çin o.
Ebe na rastîye serra newîye ya 2015î ma rê, şarê ma rê, welatê ma rê serkewtiş bîyaro.
Serra newî ya 2015î plan û sîyasetê bêfayde û qilêrî şarê ma ra dûrî bikero.
Serra newî ya 2015î hesreta ma biqedêno, yewbîyena ma bîyaro.
Serra newî ya 2015î Kurdîstanî rê xeyr û şabîyene, mizgîne bîyaro.
Serra newî ya 2015î miradê şima bîyaro, hesreta şima biqedêno.
Bi nê wastîşan seba serra şima ya newîye bi can û bi zerrîya xo vana ke:
[pull_quote_center]Serra şima ya newîye firaz bo![/pull_quote_center]
